O Concello acumula decenas de servizos municipais prorrogados ou sen contrato ben porque o goberno local non logra sacar adiante os concursos ou porque, cando o fai, os procesos son recorridos ou ningunha empresa presenta ofertas e quedan desertos. Nestes casos, as razóns do desinterese poderían estar nos baixos orzamentos que se fixan para a xestión dalgúns servizos ou na introdución das chamadas cláusulas sociais, polas que o Concello realiza un maior control dos salarios e condicións laborais dos traballadores das concesionarias. Ademais, o atraso nos pagos por parte do ente local que acumulan algunhas facturas tamén podería estar detrás da reticencia das empresas.
O último caso de contrato de servizos municipal que non interesa á actual concesionaria é o de animación dos centros sociais, xa que a empresa Serviplustotal, que ata agora o xestionaba, renunciou a continuar coa prórroga que lle ofreceu o goberno local, o que provocou desde este luns unha paralización das actividades programadas e deixou sen clases e talleres a máis de 4.200 usuarios. A situación, que afecta ademais a uns 50 monitores que quedaron sen traballo á espera dunha subrogación, podería quedar solucionada nos próximos días despois de que o goberno local chegase a un acordo coa empresa Vitae para que se faga cargo deste servizo ata o mes de xuño -que é cando finalizan as actividades programadas- por un importe de 71.134 euros. Segundo informan fontes da alcaldía, a apertura dos centros sociais tamén estará garantida, xa que diso encárgase a empresa Combina Social, de Cogami.
GRÚA MUNICIPAL. Pero aínda que este problema quedaría solucionado de forma momentánea ata que se licite de novo o concurso de xestión dos centros sociais, a adxudicación doutros servizos municipais acumula atrasos porque o goberno local tivo que declarar deserto o concurso ante a falta de oferta e iniciar un proceso negociado, como ocorreu co contrato do guindastre municipal. O importe ofrecido polo Concello non convenceu inicialmente a ningunha empresa e o goberno local decidiu invitar entón a firmas do sector dado que a actual concesionaria, Cechalva, anunciou que non continuaría xestionando o servizo porque non lle resultaba rendible. Finalmente, dúas empresas presentaron ofertas e na actualidade este concurso está á espera de resolución, xa que as firmas aínda poden mellorar a súa proposta inicial. Namentres, aos traballadores da concesionaria débenselles catro pagas porque a empresa asegura que non ten diñeiro en caixa para pagar debido a que o Concello lle debe catro facturas.
O servizo de axuda a domicilio tamén se está prestando na actualidade cun contrato prorrogado por uns meses e á espera de que salga o novo concurso, xa que a actual concesionaria, Valoriza Servizos á Dependencia, renunciou a unha prórroga de dous anos ao xustificar que o prezo que lle abona o Concello é moi axustado e non lle compensa.
O mesmo ocorre coa xestión do centro de día Antonio Gandoy, que xestiona co contrato prorrogado a empresa Innovacion y Desarrollo Asistencial, que tamén mostrou as súas reticencias a continuar co servizo porque aseguraba que lle daba perdas. O goberno local licitou o mes pasado de novo este contrato por un importe de 425.000 euros anuais e unha duración dun ano, prorrogable como máximo ata catro.
Outra empresa que desistiu de presentarse ao concurso a pesar de que aínda xestiona o servizo é Sermasa, que se encarga da apertura dos museos municipais. A firma está integrada no grupo Vendex, investigado no marco da operación Pokemon, e non presentou oferta a un novo concurso que ademais acumula máis de catro anos de atraso desde que foi convocado por primeira vez, xa que unha asociación de guías turísticos emendou as bases e o goberno local decidiu tras varias consultas cambialas.
Tras un longo proceso, a multinacional Eulen foi a única firma que optou ao concurso e na actualidade o Concello está á espera de que a empresa presente a documentación requirida para adxudicarlle definitivamente un contrato que terá un custo anual duns 585.000 euros e afectará tamén á xestión das oficinas de turismo.
COMIDA DE MAIORES. Pero o goberno local non só ten problemas á hora de adxudicar os grandes contratos, xa que tamén para aqueles servizos que externaliza puntualmente, como a organización dunha comida para os maiores do municipio, non atopa empresas dispostas a asumilo polo reducido prezo ofertado. De feito, o goberno local tivo que licitar ata en tres ocasións este contrato, o que implicou que de momento non se puidese celebrar este tradicional encontro.
Noutros concursos o Concello non logra atraer empresas porque fixa un canon demasiado elevado, como ocorreu co proceso para adxudicar a cafetería do centro cultural O Vello Cárcere. O prego de condicións estipulaba un prezo de aluguer polo local de 2.000 euros ao mes. Só se presentou unha firma, aínda que a súa oferta foi anulada porque non cumpría os requisitos estipulados. O goberno local iniciou un novo proceso, mantendo o prezo, aínda que modificou algunhas cláusulas para ofrecer un almacén e flexibilizar os horarios e as comidas que debe haber no menú.
