Francisco Sixto comprou en setembro de 2000 unha casa unifamiliar na Praza das Illas, no barrio de Montirón, que ten no baixo un pequeno local. En outubro de 1999, o IGVS vendeu ese espazo ao Concello de Lugo, algo que el sabe por dúas razóns: a primeira, porque o din as súas escrituras; a segunda, porque é ao Concello a quen reclama o 50% do que ten que abonar por danos na casa, sen lograr ata agora que llo pague.
Neste momento, Sixto denuncia a presenza dun buraco no soportal da súa vivenda, xusto diante do local, cedido a unha das asociacións veciñais de Montirón pero que apenas lle dá uso, segundo el asegura. Ese buraco está situado nunha esquina da súa sala de estar e leva aí máis de dous anos. "Por aquí entra un frío terrible e moita humidade, non podemos seguir así, pero ninguén se fai cargo nin tampouco me venden o local", explica.
Desde que apareceu, Francisco escribiu decenas de correos electrónicos ao Concello. Di que moitos quedaron sen resposta e que, os que mereceron unha, non aclaran nada nin establecen ningún compromiso para asumir a obra dunha vez.
A concellaría de participación cidadá aclara que, aínda que o Concello estivese disposto a desfacerse do local e vendelo, non se podería facer de forma directa a un veciño interesado
Non é a primeira vez que se ve nunha situación similar. En 2011, a Inspección Técnica de Edificios estableceu que se debía cambiar o tellado. "Levei un orzamento ao Concello. Dixéronme que tiña que levar tres e fíxeno. Durante meses non obtiven resposta e cando chegou pasara un ano, caducaran os orzamentos presentados e enviáronme un que superaba por 4.000 euros os que presentara eu", indica. O proxecto quedou finalmente "estancado" e o tellado aínda non se cambiou. é dicir, que non se deu cumprimento a unha inspección que fai o propio Concello.
Recentemente, Francisco reuniuse coa edil de participación cidadá, Cristina López, e pouco despois coa alcaldesa, Lara Méndez, para dar conta da súa situación, sen cambios.
Polo momento, como está cedido a unha asociación veciñal, non se expón inicialo, xa que asegura que o usan como localización de talleres de pintura e doutras actividades. Francisco Sixto, pola súa banda, asegura que leva meses en desuso.
SOLUCIÓN AOS DANOS. Desde a área municipal indicouse este mércores que se estudaría a existencia dos danos que denuncia Sixto e asegurouse que, unha vez se confirmen, procederase ao seu arranxo.
