O Concello ultima este fin de semana o traslado das persoas sen teito do Pavillón dos Deportes ao Fogar do Transeúnte. O proceso inclúe tamén a recollida do material habilitado para atender a estes usuarios. O polideportivo acolleu a ao redor de 42 persoas diarias, cunha media de idade de entre 30 e 54 anos. A maioría –máis do 60 por cento– procedían de lugares como Santiago, Ourense e A Coruña. Entre eles había persoas sen teito de Lugo, pero tamén de localidades da provincia que non dispoñen deste tipo de instalacións e incluso doutros puntos, como Bilbao e Madrid.
Ademais, o pavillón acolleu tamén a inmigrantes, persoas con protección internacional pendentes de valoración e refuxiados pendentes de recibir axuda de asociacións como Accem. "Boa parte destas persoas non cubrirían ou perfil dous sen teito pero isto non se tivo en conta xa que a prioridade foi evitar que alguén se puidese ver na rúa nunha situación de risco sanitario", destacou a edil de benestar, inclusión e persoas maiores, Olga López.
Os servizos sociais municipais ofreceron a este transeúntes aloxamento e comida, pero tamén traballaron na súa inserción sociolaboral e algún deles saíu das instalacións deportivas xa cun emprego.
HABILITACIÓN. A alcaldesa, Lara Méndez, e a edil de benestar social seguiron o sábado os labores de traslado desde o pavillón e agradeceron ao equipo de voluntarios da Cruz Vermella o seu apoio durante estes case tres meses de confinamento dos transeúntes no pavillón, habilitado o pasado 27 de marzo de xeito provisional para reforzar as instalacións do Fogar do Transeúnte, que se viron desbordadas para atender ás persoas sen teito albergadas durante o confinamento.
O Concello dispuxo no pavillón camas, baños e duchas, así como unha zona de enfermería e áreas de lecer, tanto interiores como exteriores, para satisfacer as necesidades materiais e de convivencia daquelas persoas que se enfrontaban ás medidas de illamento decretadas e que teñen menos recursos para superar esta situación de risco.
Agora, unha vez recuperada a mobilidade, moitos deles volverán ao seu lugar de orixe polo que o Fogar do Transeúnte poderá dar cabida aos usuarios coas garantías de protección e os espazos de seguridade necesarios.
