A metade dos preto de 80 servizos do Concello que están externalizados con empresas préstanse sen que exista un contrato en vigor. Os datos forman parte dun estudo elaborado polo grupo municipal de Ciudadanos para xustificar a petición de comparecencia no pleno da concelleira de economía, Ana Prieto, quen segundo esta formación comprometeuse o pasado ano a sacar a licitación os principais contratos caducados.
Con todo, desde Cs aseguran que, lonxe de resolverse o problema, incrementouse durante os últimos doce meses, nos que caducaron un total de 13 contratos, entre eles algúns de elevada contía económica como a xestión dos complexos deportivos de Frigsa, As Pedreiras e o Polvorín.
Ademais, acaban de caducar ou están a piques de facelo outros contratos importantes como os seguros de responsabilidade civil, a apertura do auditorio municipal Gustavo Freire e a vixilancia do centro sociais.
A portavoz da formación laranxa, Olga Louzao, detalla que no que vai do presente mandato municipal pasouse de 11 servizos sen contrato "herdados" do goberno de José López Orozco, a un total de 35, con 25 deles caducados desde 2015.
"GOBERNO CADUCO". "Isto é unha mostra máis de que este goberno está caduco, igual que os seus contratos. Na súa presa por cortar cintas para a campaña electoral a alcaldesa desatendeu unha das grandes prioridades que ten o Concello, que é dar os mellores servizos posibles aos lucenses", considera Olga Louzao.
Ciudadanos, que cualifica de ilegalidade, "irregularidade e irresponsabilidade" que non se liciten estes contratos, considera que esta situación impide non só abaratar os custos dos servizos senón tamén mellorar a súa calidade coa implantación de nova maquinaria máis moderna, como di que podería ocorrer no caso do servizo de limpeza da cidade.
A petición de comparecencia de Ana Prieto ten como obxectivo que a concelleira explique a situación dos contratos e se o goberno municipal ten pensado facer algo para solucionalo.
Olga Louzao recorda que entre os servizos sen contrato tamén se atopan aqueles que nunca se licitaron, como ocorre coa subministración de enerxía eléctrica das dependencias municipais, o do combustible para os vehículos do Concello ou o dos agasallos protocolarios. Ademais, indica que tamén están pendentes de readxudicarse aqueles servizos que máis gasto lle supoñen ao Concello como o de limpeza, a recadación por vía executiva ou a xestión das plantas depuradora e potabilizadora de auga.
"Está claro que para o que resta de mandato a alcaldesa e o seu equipo vanse centrar en facer obras no canto de solucionar estes problemas. Desta forma, deixará unha herdanza envelenada para os que veñan detrás", opina Louzao.
