O goberno local de Lugo acusa abertamente ao Partido Popular de aumentar "a súa metralla xudicial", porque a estas alturas xa sabe "que non gañará nas urnas" nas próximas eleccións locais.
"Como terá datos ou enquisas que lle din que non vai gañar a Alcaldía nas próximas eleccións, trata de botar merda" para gañar algún voto máis, dixo o portavoz do goberno municipal, Miguel Fernández.
Así se expresou Miguel Fernández despois de que o portavoz do Partido Popular, Antonio Ameijide, acompañado por outros compañeiros do grupo municipal, presentase este mércores unha denuncia para "pór en coñecemento do xulgado a situación dos máis de vinte contratos caducados que ten o Concello de Lugo".
De feito, os populares alegan que o goberno local podería estar a incorrer "nun posible delito de prevaricación e malversación de caudais públicos".
Fernández recordou que "a xurisprudencia determina que os contratos cuxos pregos se están tramitando non teñen a condición xurídica de caducados".
Ao seu xuízo, o Partido Popular trata de "falsear" a información, porque "a día de hoxe, o Concello ten en trámite 80 contratos". "É moi ousado que o único partido político en Europa que está condenado por corrupción faga acusacións penais relacionadas coa contratación municipal", engadiu.
"Responde á rabieta e á frustración do portavoz municipal por non ser o candidato á Alcaldía, co agravio engadido de que o propio Feijóo recoñeceu que nin sequera foi nunca unha opción".
