A alcaldesa de Lugo, Lara Méndez, mantivo este mércores un encontro cos músicos da Banda Municipal para comunicarlles que o procedemento que afectaba á súa situación laboral concluíu definitivamente e que a situación dos empregados públicos con praza de músicos no Concello está regularizada.
A rexedora, que acudiu á reunión acompañada pola responsable de gobernanza, Paula Alvarellos, trasladoulles que, desde o primeiro momento, a vontade do goberno local foi a finalizar coa incerteza existente sobre estes postos de traballo, para mantelos.
Lara Méndez asegura que durante todo o procedemento, o Concello cumpriu sempre a legalidade, xa que articularon todos aqueles mecanismos que permitiron a simultaneidade das súas funcións como docentes e músicos, co obxectivo de evitar o peche da escola municipal de música e os prexuízos que ocasionaría aos máis de mil alumnos.
A alcaldesa admitiu que conciliar todos estes aspectos demorou "máis do desexado" o procedemento e indicou que, segundo os criterios técnicos, a solución que mellor garantía estes postos de traballo pasaba por vincular a regularización e consolidación deste persoal coa aprobación dun plan de ordenación de recursos humanos.
A rexedora asegurou, ademais, que o feito de contar coa RPT supuxo tamén ocupar definitivamente estes postos por 12 funcionarios de carreira e 6 empregados con contrato laboral a tempo completo, ademais da vacante por excedencia e a praza de director, que substituíron, á súa vez, aos 24 postos a tempo parcial que contemplaba o documento anterior do ano 2006.
XORNADA LABORAL. Pola súa banda, a responsable de gobernanza explicou que esta reorganización tiña dúas finalidades claras. A primeira era incrementar a tempo completo a xornada laboral dos músicos. A segunda está baseada no feito que sobre o persoal adscrito á banda sostense a aposta do Concello por unha escola de música.
O novo paso coñeceuse tras transcender a renuncia do director, elixido en marzo.
