O Concello reduce os procedementos de traballo e os funcionarios ficharán

O goberno local quere sentar as bases, nestes primeiros meses de mandato, para modernizar e axilizar os procedementos de traballo no Concello e con ese fin acaba de aprobar un regulamento de funcionamento interno que reduciu á metade "os máis de 225 procedementos administrativos que había", segundo informou este venres a alcaldesa, Lara Méndez, que deu conta das novidades xunto á concelleira de gobernanza, Paula Alvarellos. As outras son que comezou o rexistro da pegada dactilar dos traballadores municipais para pór en marcha o sistema de control da xornada laboral e a ampliación de funcións a dous altos técnicos do Concello.

A rexedora aprobou este venres un decreto no que dá novas funcións na área de gobernanza e recursos humanos ao interventor e á vicesecretaria. A área engloba os departamentos de tesourería, facenda local, inspección de tributos; contratación, patrimonio e fomento; planificación e control de concesións, e persoal.

Estas dúas figuras, interventor e vicesecretaria, serán claves na coordinación desta área de gobernanza, en estreita colaboración coa concelleira responsable, explicou Méndez. Segundo detallou a rexedora, o seu papel consistirá, principalmente, en ditar instrucións e establecer as prioridades na tramitación administrativa.

Para levar a cabo estas funcións, os dous técnicos disporán do persoal adscrito aos servizos da área de gobernanza e recursos humanos, explicou Méndez, quen xustificou as medidas tomadas na necesidade de reverter "as inercias que lastraban os procedementos burocráticos e que estaban a enlentecer os proxectos iniciados". "Cando falamos de que estamos a impulsar a segunda transformación de Lugo, tamén referímonos a todos estes aspectos, a modernizar as nosas maneiras e xeitos de traballar dentro da administración", destacou a alcaldesa.

A administración empezou a tomar a pegada dactilar dos traballadores co reto de que en xaneiro todos os empregados fichen

Con esta nova organización, o goberno descarta, polo menos de momento, cubrir a dirección de recursos humanos, un posto creado no anterior mandato e que permanece vacante desde que, en xuño, Emilio Martínez renunciou a continuar.

Respecto ao control horario, Alvarellos explicou que a gravación da pegada dactilar comezou este venres polo departamento de persoal e que continuará polos restantes. O traballo faise con medios propios e o proceso dura uns 4 minutos por traballador. O obxectivo é que, o 1 de xaneiro, todos os traballadores do Concello fichen. Ata esa data poderán facelo de forma voluntaria. O sistema foi probado este venres e funcionou sen incidencias, asegurou a edil.

Única institución onde non se ficha a pesar de que desde 2008 hai medios

O control horario mediante lectura bioemétrica aplicarase a todos os servizos e centros de traballo municipais, incluídos aqueles en os que, polas súas características, xa ‘fichan', como a Policía Local. O Concello ten os medios desde 2008, pero ata agora ningún goberno logrou pór en marcha o sistema. Nalgunha ocasión, porque pretendía que fose gradual e os sindicatos pedían que todo o persoal empezase á vez. é a única administración de Lugo sen control horario.

O goberno prevé saldar este ano os reforzos de 2018 e 2019

O goberno local prevé abonar todos os reforzos que se deben aos bombeiros antes de fin de ano. Son os do verán de 2018 e todos os de 2019. O atraso débese á necesidade de xustificar en intervención esas xornadas e de habilitar crédito debido a que a partida de horas extras é insuficiente. O malestar dos bombeiros é grande polo atraso en cobrar e porque se lles pediu que acheguen datos dos reforzos realizados, o que debería ter o Concello.