Os lucenses seguen acudindo de forma masiva ao feiral, o que provoca que día tras día haxa colas. En vésperas do día grande deste martes, durante a xornada deste luns volveu haber centos de persoas que tiveron que agardar para poder entrar ao feiral.
E esas ganas de barracas finalmente poderanse satisfacer un día máis. As atraccións ofrecerán ademais prezos máis rebaixados nesa despedida.
A alcaldesa, Lara Méndez, anunciou este luns que autorizaba a apertura do feiral ata este mércores, día 13, co compromiso de que as entradas rebaixaranse a 1,5 euros para os nenos e dous euros para os mozos e adultos.
A rexedora aceptou así unha petición realizada polos feirantes, que leva celebrar un 'día do neno'. Nesa última xornada, ao ser laborable, o recinto abrirá de cinco da tarde a unha da madrugada, anunciou a rexedora.
Tras anunciar ese día extra de barracas, Méndez dixo que a vontade é ir retomando aos poucos a normalidade a medida que as cifras do covid melloran, sempre gardando precaucións e respectando as normas da Xunta.
Mostrouse convencida de que as festas están a ser un importante revulsivo económico para toda a cidade, non só para os barraquistas, e defendeu que as celebracións tamén tiveron un impacto social positivo, porque os nenos "merecían uns días de diversión despois destas etapas tan duras".
Cando se enfoca xa o fin das celebracións, Méndez agradeceu o comportamento exemplar dos cidadáns e lamentou as longas colas que houbo que gardar para acceder ao recinto feiral, pero recalcou que se trata dun "mal menor", dado que as normas establecéronse para garantir o cumprimento dos aforamentos e gardar as medidas de prevención obrigadas, porque a normalidade non é aínda total e a saúde debe primar, remarcou.
Recordou que ese condicionante pesa nunhas festas que, como consecuencia do covid, estiveron máis vixiadas que nunca, xa que, a maiores dos dispositivos policiais, o Concello contratou un servizo de seguridade para controlar os accesos e vixiar desde o aire con drones que non houbese aglomeracións.
Esa vixilancia inclúe tamén o recordatorio de que tanto os feirantes como o público deben cumprir cun protocolo sanitario estrito. Os empresarios deben cumprir coas normas do protocolo sanitario e os cidadáns deben usar máscara, respectar as distancias de seguridade e usar o xel hidroalcólico, recordou.
