O Concello de Lugo presentou este mércores o seu Plan Reanima, que inxectará 5 millóns de euros de liquidez na economía lucense a través de axudas directas. Tratarase de facer ademais, segundo explicou a alcaldesa, Lara Méndez, de xeito áxil, coa mínima burocracia e resolvendo por estrita orde de solicitude coa idea de que ese efectivo estea nas contas correntes dos empresarios e os cidadáns lucenses no menor tempo posible. As bases publicaranse no Boletín Oficial nos próximos días.
En principio, calquera empresa que se viu obrigada ao cesamento de actividade polo decreto do Goberno central pola pandemia de Covid-19 poderá recibir unha axuda directa de 1.200 euros. No caso de autónomos, calquera que vexa descender os seus ingresos en polo menos un 75% poderá solicitar 750 euros.
Para as empresas que teñan empregados, ábrense dous escenarios, en función de se presentaron Ertes ou non e segundo os traballadores que teñan: as axudas por empregado van desde os 120 aos 600 euros.
Para as familias, establécense axudas á conciliación, e daranse por fillo. Calquera traballador que se viu afectado por unha regulación de emprego ou que vexa descender os seus ingresos nun 75% ou teña que reducir a súa xornada para coidar aos seus fillos poderá solicitar unha axuda de 100 euros polo primeiro, 150 se ten dous ou 175 se son tres.
