O Concello abonou esta semana tres multas impostas pola Consellería de Medio Ambiente e a Confederación Hidrográfica do Miño-Sil (CHMS) por mor doutros tantas verteduras a canles fluviais do municipio e que supoñen un desembolso de case 22.000 euros. A concellaría de infraestruturas abonou as sancións logo dos informes do enxeñeiro de montes municipal nos que se estimaba procedente o pago.
O expediente sancionador da Xunta ten un importe de 3.005 euros, mentres os outros da CHMS ascenden a 7.281 e 11.571 euros, respectivamente.
A multa máis cuantiosa das impostas pola Confederación está relacionada co mal funcionamento da estación de bombeo de augas residuais da Garaballa de Arriba, que xera verteduras ao río Rato. A Confederación Hidrodráfica do Miño-Sil impuxo 10.000 euros de multa ao Concello pola reiteración desta deficiencia, así como 1.680 euros máis en concepto de indemnización polos danos causados ao dominio público hidráulico.
O Concello xa recibira outra denuncia anterior da Xunta por importe de 3.000 euros debido ao mal funcionamento da estación de bombeo. O último incidente rexistrado foi o pasado maio cando unha nova vertedura de augas residuais, que fora causado por unha forte tormenta caída sobre a zona, afectou a canle e provocou malos cheiros na contorna.
DENUNCIA XUDICIAL. Os problemas nesa zona levan anos motivando protestas e incluso o BNG presentou denuncias ante a Confederación Hidrográfica e o Seprona por esta situación. Un informe deste último servizo da Garda Civil provocou a apertura dunha investigación por parte do xulgado de instrución número 2 de Lugo e a declaración xudicial do concelleiro de desenvolvemento sostible, Daniel Piñeiro, quen explicou que o goberno local sempre seguiu os consellos dos técnicos neste problema, que se prevé resolver co futuro contrato de xestión da depuradora de Lugo.
