A alcaldesa de Lugo, Lara Méndez, confirmou que o goberno local segue realizando xestións para cumprir as sentenzas que obrigan á demolición do Garañón, a polémica urbanización que derivou nun proceso penal no que aínda figuran como imputados o que foi rexedor local da cidade durante catro mandatos, José López Orozco, e o exsecretario xeral dos socialistas galegos, José Ramón Gómez Besteiro”.
A alcaldesa confirmou, a preguntas dos medios de comunicación, que o goberno local xa falou co promotor das torres para fixar unha reunión con el e ordenou aos técnicos municipais a elaboración dun inventario de leiras dispoñibles, que sexan propiedade do Concello, para intentar unha permuta de terreos.
"Non podería dicir que podamos derrubar as torres antes das municipais. Se estamos en disposición de facelo, farémolo"
“O goberno falou co promotor e estamos a expensas de manter unha conversación e unha reunión de traballo desde un punto de vista máis técnico”, dixo a rexedora, porque xa se fixo un inventario por parte dos servizos municipais das “leiras que podemos ter a disposición para buscar esa permuta”. Unha permuta, aclarou, para buscar “ese cambio de edificabilidade que nestes momentos ten recoñecida o promotor”.
“Non podemos obviar que ten un dereito de edificabilidade adquirido que lle foi proporcionado polo PXOM do Partido Popular do ano 91. Eses dereitos, gústennos máis ou menos, son dereitos adquiridos. O que se trata agora é de poder chegar a acordos desde o diálogo e o entendemento”, engadiu.
Méndez recoñeceu que a día de hoxe non pode asegurar se o Concello poderá derrubar as dúas torres do Garañón antes das municipais. “Non podería dicilo. Se estamos en disposición de facelo farémolo”, recoñeceu.
