A xunta de goberno local acordou este mércores abrir un expediente sancionador á empresa Serviplustotal, adxudicataria do servizo de animación sociocultural nos centros sociais municipais e das actividades extraescolares nos colexios, por incumprir unha cláusula do contrato que obriga á firma a subir os soldos conforme ao convenio colectivo do sector.
O portavoz do goberno local, Miguel Fernández, informou en rolda de prensa desta decisión, que implica unha sanción do 5% de total do contrato, o que supón un importe de 9.000 euros. Fernández explicou que o último convenio do sector aprobado implica unha subida salarial de 3% aos traballadores, aínda que Serviplustotal "non xustificou" ante o Concello que se fixo efectivo ese aumento dos soldos.
O edil lucense indicou que a multa aínda non é definitiva, porque se dará un "trámite de audiencia" á empresa para que presente alegacións.
Non é a primeira vez que o Concello sanciona a esta empresa concesionaria, xa que en maio pasado foi ratificada pola xunta de goberno unha sanción de 300 euros por non facilitar a información que lle foi solicitada.
A empresa coruñesa Serviplustotal logrou en 2016 a adxudicación do contrato para a animación dos sete centros sociais por un período de dous anos, por un importe anual de 194.200 euros.
O contrato finalizou en outubro pasado e o Concello decidiu prorrogalo por tres meses á espera de aprobar os pregos para a convocatoria dun novo concurso.
CLÁUSULAS. O contrato incluía cláusulas sociais en defensa dos dereitos dos traballadores, nas que se valoraba para a súa adxudicación a oferta de mellora nas condicións laborais e salariais cun máximo de 10 puntos. Con todo, o grupo municipal de Ace-EU denunciou hai meses as condicións laborais dos traballadores desta firma e aseguraba que algúns empregados presentaran denuncias ante Inspección de Traballo. Ademais, a mediados do mes pasado este grupo informaba de que a empresa aínda non abonara a nómina de novembro.
Ace-EU denunciou incumprimentos da empresa na subministración de material para cursos.