O Concello empezará a colocar este luns as ferramentas necesarias para estudar os fluxos de tráfico que hai na intersección da Ronda da Muralla coa Avenida da Coruña e San Fernando. En base á información que se obteña decidirase se, como se anunciou, unha rotonda é a mellor solución para mellorar a circulación e a seguridade de automobilistas e peóns.
A colocación dos aparellos comezará ás dez da mañá e calcúlase que durará unhas catro horas. Instalaranse medidores en seis puntos distintos da intersección e permanecerán ata o luns da seguinte semana, co obxectivo de obter datos dos hábitos de circulación nun período semanal, con días laborais e fin de semana.
"Seguimos avanzando cara a unha cidade para as persoas e para liberar o tráfico a motor na contorna da muralla", afirmou o primeiro tenente de alcalde e responsable da área de mobilidade e infraestruturas, Rubén Arroxo.
O anterior goberno local xa anunciara a construción dunha rotonda neste lugar. En xaneiro de 2018 informaba de que o proxecto estaba moi avanzado e de que a obra se contrataría con cargo ao orzamento de 2018. Con todo, no outono anunciaba a contratación á empresa Iceacsa Consultores dun estudo de simulación para ver se a glorieta era viable. Ese traballo é o que vai facerse agora, cun custo de 17.545 euros. En función dos resultados, decidirase se a rotonda é a intervención máis adecuada. "O noso obxectivo político é claro, pero imos facer as cousas ben, tendo en conta as solucións técnicas que emanen dos datos obtidos", afirma Arroxo.
Recentemente, os nacionalistas defendían que a glorieta non tiña por que ser incompatible co plan para eliminar o tráfico de toda a Ronda da Muralla nun prazo de oito anos. Se o obxectivo é completar a peonalización do centro histórico e pechar ao tráfico a Rúa Montevideo, San Fernando sería a entrada e saída ao aparcadoiro da Praza de Ferrol.
O estudo que realizará Iceacsa Consultores servirase de ferramentas de simulación, que proporcionan imaxes sobre os movementos de vehículos e viandantes, para determinar despois a medida máis adecuada para regular a circulación. Aínda sendo viable unha rotonda, podería descartarse se se detecta unha elevada afluencia de peóns.
Segundo as medicións realizadas polo Concello no anterior mandato, nalgúns tramos da Ronda da Muralla chégase a rexistrar algúns días o paso de 10.000 vehículos, como ocorre no que vai desde a Rúa Castelao a Luís Cordeiro (antiga Ruiz de Alda), a pouca distancia de San Fernando. O tramo desde a Avenida da Coruña ata a Rúa Nova é un dos que menos intensidade de tráfico rexistra, preto de 5.500 vehículos de intensidade media ao longo do ano.
A rede viaria estará estruturada en rúas de primeira orde, que son as que darán acceso ao barrio (Avenida Infanta Elena, Avenida Paulo Fabio, Avenida da Coruña e Ronda Norte) e de segundo, que estruturarán e organizarán os distintos usos da urbanización. Para reducir a presenza de coches nela crearanse aparcadoiros en Infanta Elena.
Co fin de que o barrio se axuste no posible á topografía actual, conservaranse algúns viarios, como a Rúa do Vento. Esta concíbese como unha vía interior, restrinxida a tráfico privado e con zonas de acougado da velocidade (límite 30) nos accesos, para as entradas puntuais.
A urbanización disporá de puntos de recarga para vehículos eléctricos e primaranse as sendas peonís e ciclistas. Haberaas ao longo de todo o barrio, con zonas seguras para estacionar. Discorrerán por unha rede de corredores verdes e espazos naturalizados con especies autóctonas. O pavimento será un chan estabilizado cun ligante a base de vidro reciclado, que dá estabilidade e durabilidade e reduce o mantemento.
O barrio estenderase a ambos os lados de Infanta Elena, forma parte do plan Lugo Life+Biodinámico e pretende ser un modelo de urbanismo sostible. O deseño corre a cargo das empresas Avento e Proyfe e prevese que teña 147.000 metros cadrados de zonas verdes e espazos libres, cinco veces máis do que fixa o PXOM.
