O Concello de Lugo retomou este xoves, tras 20 meses, os plenos presenciais. Desde o 27 de febreiro do ano pasado celebráronse 21, todos telemáticos. Esa volta á normalidade da corporación local foi máis acalorada do normal. A tensión disparouse no sexto punto da orde do día, cando se debatía unha moción do PP para que os clubs da cidade poidan utilizar as canchas deportivas dos centros escolares municipais fose do horario lectivo.
A algarada desatouse por mor de como se interpretou a intervención do edil popular Óscar Poy, que defendeu esta proposta. A alcaldesa, Lara Méndez, acusouno de "falta de respecto e de educación" por dicir, ao seu xuízo, que a xestión do concelleiro de deportes, Mauricio Repetto, "non está ao alcance das súas capacidades" e insinuou que ese ataque se debía "á orientación sexual" deste último porque, segundo afirmou a rexedora local, "é gai".
Hoxe, a alcaldesa @LaraMendezLopez fíxome saber que non lle parece axeitada nen educada a miña expresión “mi querida alcaldesa”.
Disculpeime personalmente con ela ao rematar o pleno e reitero istas desculpas a través das redes sociais: Non volverá a acontecer.— Oscar Poy Franco (@OPoyF) October 28, 2021
Óscar Poy, que intentou intervir, pero non puido, asegurou que o que el dixo, pois levaba escrita a súa intervención, foi que "ista é unha moción propositiva, entendemos que perfectamente realizable, ao alcance da capacidade de xestión da persoa na que delegou as competencias dista área de deportes".
O viceportavoz popular, Antonio Ameijide, que pediu que a alcaldesa retirase as súas palabras e desculpásese, o que esta non fixo, acusou a Lara Méndez de "pasarse de freada" e de exercer unha "ditadura".