O concelleiro de infraestruturas urbanas de Lugo, Alexandre Penas, anunciou que se renovarán os paneis informativos das paradas de autobús "que se atopan máis desgastados e os que son máis antigos". Estes traballos forman parte do proceso de renovación das liñas de transporte público da cidade.
Sobre este proceso, Alexandre Penas indicou que "está xa completamente confeccionado e seguimos a dar pasos adiante na súa implantación". Recordou que o novo proxecto de transporte urbano contempla 22 liñas, que estarán cubertas por 21 autobuses, e avanzou que antes de que entren en funcionamento realizarán unha campaña de promoción para dalas a coñecer aos lucenses.
O plan de transporte organízase ao redor de catro "grandes liñas que conectarán as zonas norte e sur de Lugo, e dúas máis que conectarán o leste co oeste da cidade". Destacou que as zonas que concentran máis poboación terán un bus cunha frecuencia de 10 minutos. Ademais, mellorarase a conexión co Hula, con seis liñas directas que unirán o hospital con distintos barrios da cidade.
