O Concello de Lugo instou este martes á Xunta a realizar os "traballos ordinarios de conservación" da muralla romana da cidade, declarada Patrimonio da Humanidade pola Unesco, para terminar "coa imaxe de abandono" do monumento, que está a provocar "numerosas queixas" por parte dos veciños.
O portavoz socialista do goberno bipartito, Miguel Fernández, recordou que as "competencias pertencen ao goberno galego" polo que reclama que "actúe o máis rápido posible" e cumpra "coa súa obrigación" de ter en boas condicións "este ben mundial".
Fernández asegura que unha parte importante do adarve da muralla, que os veciños da cidade utilizan a diario para pasear e é un dos lugares máis visitados polos turistas que chegan a Lugo, está cuberto por unha "cantidade inxente de maleza". "Así o pon de manifesto as numerosas queixas de cidadáns que recibimos", indicou o portavoz municipal.
O edil manifestou a preocupación do goberno local "polo extremo ao que se chegou en moitos dos cubos da muralla, onde toda, ou polo menos a maior parte da superficie peonil, está cuberta de herba e de sucidade, o que dificulta a mobilidade e resulta indigno para "un ben como este".
