O Concello de Lugo licitará este ano un total de 132 contratos e adxudicacións que suporán un importe conxunto que roldará un mínimo de 68 millóns de euros.
Estas previsións figuran no Plan de Contratación Pública aprobado na xunta de goberno local deste mércores, segundo trasladan nun comunicado.
Medio Ambiente acapararía case a metade deste orzamento, en 20 licitacións, e séguelle Infraestruturas, con 18 actuacións programadas. Doutra banda, destacan Medio Rural e Deportes, con 12, e as iniciativas enmarcadas na Estratexia Dusi, que suman outra ducia de intervencións.
As prioridades establecidas pola rexedora, Lara Méndez, "tal e como ela mesma avanzou en decembro", sitúan, como primeiro obxectivo, a actualización administrativa de todas as prestacións que están en vigor.
"Pero tamén esperamos poder sacar adiante novos contratos que mellorarán a xestión interna da institución como poden ser os destinados á adquisición de máis programas e equipamentos informáticos e materiais, así como a posta en marcha de colaboracións que incrementen a eficiencia da recadación e inspección tributaria, entre outros".
Doutra banda, Méndez recibiu este mesmo día o documento coas firmas recollidas pola Asociación de Veciños de Albeiros para nomear unha rúa do barrio en honra ao párroco Luis Soto Camino, cun total de 3.500 apoios.
Así mesmo, a comisión de tráfico municipal abordou precisamente a reordenación da circulación na contorna do colexio de Albeiros, unha medida que, segundo engade o Goberno local, permitirá incrementar a seguridade do alumnado e das persoas que o acompañan ás entradas e saídas do mesmo.
