O Concello de Lugo iniciou o proceso de licitación para adxudicar as casetas e os caldeiros do polbo para as patronais de San Froilán -declaradas Festa de Interese Turístico Nacional-, despois de que os anteriores adxudicatarios renunciasen a ofrecer este servizo, que representa unha das tradicións con máis arraigamento dos festexos.
As catro casetas e os caldeiros saen a licitación por un importe que rolda os 100.000 euros, despois de que os adxudicatarios renunciasen a ofrecer o servizo co prezo por ración que establecera o Concello de Lugo no anterior contrato, por mor da subida do cefalópodo en lonxa.
Finalmente, os adxudicatarios terán que ofrecer a ración de polbo -de 250 gramos- a 12 euros, mentres que a de pan mantense en 1,50 euros, a de cachelos ao mesmo prezo e a botella de tres cuartos de litro de viño de mesa sobe a 6 euros.
O prezo de saída das casetas son de 18.772 euros para o número 1; 17.700 euros para o número 2; e 16.627 euros para as 3 e 4, en función da proximidade de cada unha delas ao recinto feiral das patronais lucenses.
Os interesados terán que formalizar as súas ofertas antes do 24 de xullo no Rexistro Xeral do Concello de Lugo.
