O goberno municipal de Lugo adxudicou por 1.230.265 euros as obras de construción do novo centro social de Lamas de Prado, que prestará servizo a uns 20.000 veciños dos barrios do Carme, A Cheda, Abuín-Abella e O Castiñeiro, segundo indicou a alcaldesa, Lara Méndez.
A empresa Prado Lameiro foi a firma seleccionada para executar os traballos, que teñen un prazo dun ano. O proxecto ten como base a construción dun edificio no que a madeira terá especial protagonismo e de consumo enerxético próximo a cero. O centro social asentarase nunha parcela municipal de 886 metros cadrados que linda coas rúas Aquilino Iglesia Alvariño e Fábrica de Abella e o Concello remarcou que o obxectivo é integrar nun só edificio "moderno e funcional" os distintos servizos que agora se ofrecen nos distintos locais que ten o Concello na zona e que, di, xa quedaron pequenos.
O novo centro social estará conformado por espazos polivalentes que sirvan para actividades de dinamización de todo tipo de colectivos, desde mozos a maiores, e que axude tamén á atención aos máis pequenos e á conciliación familiar.
O goberno apuntou onte que entre os obxectivos do centro estará o de contribuír a dar unha imaxe de modernidade, innovación e mellora estética na zona e apuntou de novo a aposta por construír un edificio sostible.
Así, a madeira será o principal elemento estrutural –na liña do edificio Impulso Verde da Garaballa– e o centro irá dotado tamén de paneis fotovoltaicos, o que permitirá conseguir un consumo enerxético case "cero".
O edificio estará rodeado por unha zona verde, que permitirá separar o centro social do tráfico. No aparcadoiro contiguo contémplanse prazas de recarga eléctrica, sinalou o Concello.
Tívose en conta tamén a localización e as horas de luz e, por ese motivo, a zona zona sur disporá dun peche de láminas de madeira para regular a incidencia do sol e controlar o confort climático interior, sinalou o Concello.
Terá un salón de actos para 150 persoas e a opción de abrir ao exterior o escenario
O novo centro social terá dúas plantas e un soto, que funcionará de xeito independente. A planta baixa terá unha distribución flexible e albergará actividades recreativas e formativas.
A idea, segundo o goberno local, é levar alí actividades que favorezan a convivencia interxeracional e a conciliación familiar.
O espazo contará con tabiquería móbil para facilitar a adaptación a distintas actividades e está prevista unha zona polivalente que se poderá usar como salón de actos para 150 persoas, ludoteca, sala de conferencias, sala de lectura, de xogos, así como unha área para ximnasia e baile, detallou o Concello.
A planta baixa incorporará na fachada oeste unha abertura que permitirá inverter o sentido de funcionamento da zona expositiva do centro e crear un espazo público que permita realizar actuacións exteriores aproveitando os medios e o escenario do centro. Haberá tamén grandes ventás para dar luz.
Na primeira planta do edificio haberá tamén espazos para cursos e para actividades recreativas, como baile, teatro ou xogos.
A área de traballo social concentrarase nesa planta do inmoble, onde se situarán servizos administrativos de asesoramento e axudas sociais. Traballará alí un equipo interdisciplinar, con traballadores sociais, educadores, animadores ou auxiliares.
Modelo integrado
O novo centro integrará nun mesmo edificio as actividades lúdicas e de dinamización co traballo estritamente social, seguindo un modelo que xa se aplica no groso dos centros sociais da capital.
En Lamas de Prado ese tipo de servizos estaban dispersos ata en tres edificios diferentes. O centro aspira a ser referente de varios dos barrios máis populosos.
