O Concello de Lugo recorrerá ante o Tribunal Superior de Xusticia de Galicia o informe do Tribunal Administrativo de Contratación Pública de Galicia (Tacgal) que, en xuño, ditaminou que os técnicos municipais deberían valorar a oferta económica que presentara a empresa Cespa ao concurso para renovar o contrato do servizo de limpeza.
O Concello recorre á Xustiza porque entende que o Tacgal excedeu as súas competencias ao instar a valorar a oferta económica dunha empresa que fora previamente excluída por non cumprir cos requisitos urbanísticos necesarios para optar a xestionar o servizo de limpeza da cidade.
O goberno local sostén que o Tacgal pode valorar o proceso de contratación, pero non avaliar aspectos urbanísticos do prego. Se a empresa quedou excluída na primeira fase de valoracións, ¿que razón hai para ter que ter en conta a súa oferta económica se xa está fóra?, é a pregunta que se fan no goberno.
Sacar adiante o contrato do lixo é prioritario para o goberno local, que considera que o Tacgal incorreu en inxerencias no proceso e que se excedeu nas súas competencias ao avaliar aspectos urbanísticos do prego que obrigarían a readmitir a unha das seis empresas que foron descartadas polos técnicos municipais no primeiro proceso de avaliación.
O goberno local remarca que seguirá adiante co proceso de adxudicación a pesar de levar o caso á Xustiza
O Concello entende que se trata de cuestións que non gardan relación coas materias polas que debe velar o Tacgal e que contradín os criterios dos técnicos municipais especialistas no campo urbanístico que informaron o expediente e que fixeron os informes nos que se sustentou a decisión da mesa de contratación de excluír ás empresas que consideraban que non cumprían as condicións urbanísticas do prego do concurso.
CONTINUIDADE. O recurso ante o TSXG non levará a suspensión do proceso de contratación do servizo de limpeza urbana e de retirada de lixos, remarcou este mércores o goberno local, que considera prioritario renovar ese contrato, caducado desde 2017.
O goberno sostén que é prioritario adecuar o servizo de limpeza ás necesidades e iso pasa por ter unha nova concesionaria. Na situación actual, co contrato caducado, o Concello non pode sequera cambiar un colector roto.
Este concurso foi paralizado ata o momento en xaneiro, maio e agosto de 2021
Para o equipo de Lara Méndez cambiar o modelo de limpeza é clave porque ese servizo é estratéxico para o modelo de cidade baseado na sustentabilidade que se trata de impulsar en Lugo, di.
Paralelamente, o actual responsable do servizo, Miguel Fernández
Este concurso foi paralizado ata o momento en xaneiro, maio e agosto de 2021 e eses paróns afectan á necesidade de renovar un servizo que resulta esencial para a cidade, dado que afecta ao aseo e, xa que logo, á imaxe da cidade e incluso á salubridade pública, dixo Fernández.
O portavoz do goberno defendeu que o Concello atendeu con celeridade os requirimentos do Tacgal, ao que se lle entregou toda a documentación que requiriu, acreditando a solvencia dos pregos dunha "forma impecable", tanto desde o punto de vista técnico como xurídico, manifestou Miguel Fernández.
Na primeira criba, na que se valoraron os proxectos urbanísticos, quedaron fóra algunhas das grandes firmas do sector, como Valoriza, FCC, Acciona, OHL-Ingeser e Urbaser e Cespa.
Aínda que houbo varios recursos ante o Tacgal, este finalmente permitiu seguir adiante co proceso de contratación, iso si, establecendo que se debería volver valorar a proposta de Cespa, que alegou que a súa proposta urbanística era similar á das empresas que superaron a primeira criba técnica.
En xogo está a urxente mellora do servizo de limpeza urbana da cidade e un contrato polo que Lugo pagará algo máis de 134 millóns durante os próximos dez anos.
O investimento en limpeza co novo contrato, de feito, dobrarase respecto ao gasto actual e a limpeza será o servizo con máis custo para as arcas locais, xa que suporá en torno ao 13 por cento do orzamento anual do Concello.
Miguel Fernández recordou este mércores que o goberno busca un cambio "cuantitativo e cualitativo" na limpeza urbana co contrato, que contempla a renovación de toda a maquinaria actual —para substituíla por equipos que funcionen con gas ou que sexan eléctricos ou híbridos— e tamén a substitución da contorna a 3.700 colectores de lixo que hai na cidade.
