O Concello anunciou este xoves que se descartou á firma galega Noso Capital como aspirante a xestionar o programa Lugo Transforma, a sociedade de capital risco creada para impulsar o asentamento de empresas innovadoras en Lugo.
A firma, segundo o ditame dos técnicos municipais, non acredita a solvencia técnica suficiente para xestionar o plan. Así, xa quedaría só na carreira a compañía asturiana Torsa Capital.
No entanto, Noso Capital xa anunciou este xoves mesmo que presentará recurso ante o Tribunal Administrativo de Contratación Pública de Galicia (Tacgal), xa que o Concello tivo en conta os datos económicos de 2019, cando se acababa de crear a firma, e non os de 2020, ano no que xa cumpría "holgadamente, e incluso duplicaba" os criterios de solvencia económica que pide o Concello de Lugo, alega.
O Concello informou este xoves de que a exclusión é froito de "non acreditar solvencia económica suficiente" e detallou que a decisión se tomou "por non demostrar coa súa traxectoria empresarial a necesaria garantía financeira".
á empresa que xestione o plan, que debe atraer a Lugo empresas, esíxeselle tamén que invista polo menos un millón de euros
O Concello afirmou, nese sentido, que a firma galega non conseguiu probar que dispón dos recursos necesarios para asumir a mediación financeira do fondo de capital de risco, "xa que un dos requirimentos era acreditar a disposición, en peche do exercicio 2019, dun patrimonio neto en balance superior aos 125.000 euros".
Pero a firma insiste en que en 2020 duplicou xa o patrimonio neto esixido e cre que o uso dos datos do ano 2019 por parte do Concello "parte dunha interpretación do prego que non cumpre o espírito da lei e o obxectivo de favorecer a concorrencia competitiva". Co criterio usado, cabería a posibilidade de que unha empresa solvente en 2019 e que agora estea en quebra puidese facerse co contrato, sostén para xustificar o seu recurso. Agrega que na primeira fase do concurso, a firma foi seleccionada como oferta máis vantaxosa.
Pero o ditame dos técnicos baséase nos pregos do concurso, remarca o Concello de Lugo, que advirte de que as contas do 2020 non son definitivas.
O fondo de capital risco do Concello está dotado con doce millóns e un dos requisitos que se esixen á empresa que xestione o plan é que invista un mínimo dun millón no primeiro ano de constitución do fondo.
A estratexia Lugo Transforma ten establecidos obxectivos a cinco anos, pero o prazo marcado polo Concello para o programa é de dez anos
As condicións do concurso tamén establecían que o xestor do plan debería achegar un mínimo de 120.000 euros, "compartindo así, con recursos propios, unha parte do risco garante", recordou este xoves o Concello de Lugo.
O proceso de selección do xestor de Lugo Transforma quedará pendente da resolución do Tacgal, que adoita pronunciarse con rapidez. En todo caso, a alcaldesa, Lara Méndez, volveuse a mostrar este xoves convencida de que cando se poña en marcha o fondo emprendedor será unha ferramenta poderosa para diversificar o tecido produtivo e crear emprego.
Recordou, así, que a iniciativa pioneira pretende atraer investimentos e propiciar a implantación e consolidación, nun prazo de cinco anos, de pequenas e medianas empresas de alto impacto social e ambiental, xerando a creación de empregos de calidade.
A estratexia Lugo Transforma ten establecidos obxectivos a cinco anos, pero o prazo marcado polo Concello para o programa é de dez anos. A meta é crear riqueza e postos de traballo con vistas á recuperación económica de Lugo na etapa postcovid, remarca o Concello, que sostén que a mellor vía para conseguir eses obxectivos é "dotándonos dunha ferramenta propia, moi poderosa, que diversificará o tecido produtivo e servirá de impulso aos nosos sectores estratéxicos, aqueles que van en consonancia co Lugo moderno, sostible e á vangarda que será capaz de xerar oportunidades". Apostarase por proxectos innovadores e relacionados coas enerxías limpas, a tecnoloxía ou a biotecnoloxía, entre outros.
