A sucesión de protestas que suscitou a próxima entrada en funcionamento, o día 1 de xuño, das novas liñas de bus urbano de Lugo foi recibida con resignación e comprensión pola concellaría de mobilidade, que se mostra disposta a volver convocar cantas veces sexan necesarias a mesa de transporte para analizar calquera queixa e corrección que sexa precisa. Esta foi, precisamente, a reclamación que este mesmo mércores realizaba o grupo municipal do PP, presente nesa mesa, ante as carencias detectadas nas liñas ata Conturiz.
Neste sentido, o concelleiro e tenente de alcaldesa, Rubén Arroxo, confirmou que xa se está en vías de solucionarse o problema detectado no Carqueixo, onde os veciños denunciaran que tiñan que cruzar a rotonda de acceso ao Hula para ir á nova parada. Arroxo e o delegado da Xunta, Javier Arias, analizaron este mércores o problema coa mediación do viceportavoz do PP, Antonio Ameijide. E chegaron ao acordo de instalar a marquesiña xunto á rotonda para que os usuarios non teñan que cruzar e o bus non se vexa obrigado a percorrer todos os quilómetros que facía antes para dar a volta.
Aínda falta por determinar, no entanto, se será a Xunta a encargada de facer a parada, xa que son os seus terreos, ou cederá estes ao Concello para que a faga a administración municipal.
A concellaría acepta a reclamación do PP de convocar a mesa de transporte para estudar a liña a Conturiz
MÁIS INFORMACIÓN. Esta era unha das reclamacións apoiada hai uns días pola federación de asociacións de veciños, que ten pensado reunirse en próximas datas con veciños de Montirón e da Ponte para coñecer de primeira man as súas respectivas queixas. A este respecto, o seu presidente, Jesús Vázquez, criticaba este mércores que o proceso de creación das novas liñas non fose máis participativo e que non se dea información ás asociacións barrio por barrio, a pesar de que se enviou un folleto informativo a todas as casas. No entanto, recoñecía que a renovación do bus era unha necesidade compartida por todos os lucenses e que a federación aínda non analizara o novo plan de rutas.
A esta protesta uníase a do PP en apoio dos veciños de Conturiz con respecto ás liñas de San Andrés de Castro, San Xoán de Pena, Santa Corda, Recimil, San Mamede dos Anxos e Nadela. Segundo explicaron os populares, queren que se volva a reunir a mesa de transporte para intentar "que algunha das liñas que dá servizo a esta zona achegue os veciños ao centro médico de Fingoi ou a contorna, dea unha solución para aqueles estudantes de BAC que van aos institutos de Ramón Ferreiro" e ver se se poden espaciar os horarios a Nadela.
Respecto diso, a concellaría considerou que estas parroquias non só non perden senón que gañan servizos e frecuencias. Aínda así, recordou que durante o proceso de deseño das liñas —na que participaron todos os grupos do Concello— visitáronse todos os barrios e admitíronse por unanimidade un centenar de propostas, tanto dos grupos como dos veciños. En consecuencia, mostrou a súa disposición a volver convocar a mesa de transporte para estudar os posibles problemas e as súas correccións.
Bolsa de quilómetros
Neste sentido, explicou que a nova parada, que estará só a 200 metros da anterior, permitirá ao bus facer moitos menos quilómetros só para dar a volta: "O contrato do bus vai cunha bolsa de quilómetros que se está a usar na súa totalidade e, cos que se aforran de facer o scalextric da autovía, conseguimos que ese bus poida comunicar Avenida das Américas, Fonte dos Ranchos e Residencia co Hula".
Máis servizos
"A proposta para volver facer ese scalextric", continúa, "quita a conexión ao Hula coa Avenida das Américas, Residencia e Fonte dos Ranchos, e agora o bus desa líña 5 dará a volta non medio da Ronda do Carme (cuns 10.000 habitantes)".
