A alcaldesa de Lugo, Lara Méndez, asegurou que a Casa da Muller seguiu "os protocolos establecidos" para vítimas de violencia de xénero no caso de Ana Gómez, asasinada pola súa parella, O Chamaco, diante dos seus fillos en Becerreá unha tarde de febreiro de 2016 logo de estar pola mañá nese local pedindo asesoramento.
Catro anos despois, a irmá da vítima presentou unha reclamación no rexistro do concello na que acusa o servizo municipal de mala praxe e solicita que se incoe un expediente de responsabilidade patrimonial da administración.
Este mércores, Lara Méndez apelou á necesidade de facer "un traballo conxunto" todas as administracións para combater e frear estes casos de violencia machista.
Dito isto, puntualizou que neste tipo de situacións "hai que seguir uns protocolos" que, di, respectáronse no caso de Ana Gómez por parte do persoal da Casa da Muller de Lugo.
Ademais, puxo en valor "o gran traballo que fan (estes traballadores da Casa da Muller) ao longo do ano, atendendo a máis de 3.000 mulleres con distintas problemáticas".
O PP PIDE MÁS RECURSOS. Respecto deste caso, a concelleira do PP, Macamen López, demandou "máis recursos" e "un horario que non sexa de oficina para a atención de vítimas de violencia de xénero na Casa da Muller".
Por parte da asociación Si Hai Saída, a súa presidenta, Marta López Engroba, tachou de evidente "oportunismo" que a Plataforma Feminista comparecese en rolda de prensa acompañando as reivindicacións de Martina Gómez.
"Non dubidamos que se dedica a axudar a vítimas (Plataforma Feminista), pero o seu modus operandi limítase a determinadas datas; o 25 de novembro e o oito de marzo", sinalou López Engroba.
Neste sentido, recordou que en 2016, días despois de que Ana Gómez, fose asasinada; Si Hai Saída presentou un escrito na Fiscalía de Lugo no que solicitaban que se investigasen posibles neglixencias. "Parece ser que á Plataforma Feminista non lles pareceu interesante nese momento", apostilou a presidenta da asociación.
