martes. 20.08.2019 |
El tiempo
martes. 20.08.2019
El tiempo

O Concello de Lugo creará once pasos de peóns preto dos centros de ensino

Catro dos pasos de peóns crearanse na Avenida Ramón Ferreiro. J.VÁZQUEZ
Catro dos pasos de peóns crearanse na Avenida Ramón Ferreiro. J.VÁZQUEZ

"Con esta intervención iniciamos unha serie de intervencións relacionadas coa mobilidade pensando nunha cidade amable coas persoas", afirmou Rubén Arroxo

 

O Concello de Lugo anunciou a posta en marcha dun plan para incrementar a seguridade viaria na contorna dos centros de ensino. A primeira medida será "a creación de once pasos de peóns". 

O tenente de alcalde de Lugo, Rubén Arroxo, acompañado do edil responsable de Educación, Felipe Rivas, e do concelleiro de Infraestruturas, Alexandre Penas, detallaron este sábado "as actuacións na cidade que se farán de xeito coordinado entre as concellarías de Educación, Infraestruturas e Mobilidade". 

Así, Arroxo explicou a distribución dos pasos de peóns elevados: catro estarán na Avenida de Ramón Ferreiro na contorna dos centros educativos, dous "garantirán o acceso seguro" ao Colexio Illa Verde, un para acceder ao Colexio Rosalía de Castro, dous na contorna das Mercedes e outros dous cerca do Pimentel. 

"Con esta intervención, que se fará con fondos remanentes dos que dispón no Concello de Lugo, iniciamos unha serie de intervencións relacionadas coa mobilidade pensando nunha cidade amable coas persoas", afirmou Rubén Arroxo.

CELERIDADE. A data de comezo das obras non se precisou, pero o tenente de alcalde da cidade amurallada asegurou que se vai a actuar "coa maior celeridade posible" e tratando de acurtar "prazos" para evitar "molestias á circulación e para que o próximo curso os accesos aos centros de ensino sexan máis seguros". 

Ademais de mellorar "a seguridade" no acceso aos centros educativos, a colocación destes pasos de peóns, insistiu Arroxo, servirá para "avanzar na calma do tráfico" alí onde se instalen. 
 

O Concello de Lugo creará once pasos de peóns preto dos centros de...
Comentarios