A estrutura que comezou a levantarse en 2010 como nova biblioteca municipal na Rúa das Fontes da Piringalla deixará en agosto de ser un símbolo do despropósito dalgunhas obras públicas para converterse no elegante "centro de convivencia interxeracional" Paco Martín, segundo anunciou este xoves a alcaldesa, Lara Méndez, durante a súa visita á nova infraestrutura. Os arquitectos e xefes de obra que a acompañaron na visita confirmaron que se cumprirá dabondo ese prazo de apertura dun centro que se presenta só pendente dos últimos detalles e que actualmente xa é posible valorar en todas as súas posibilidades.
Como ratificación, a alcaldesa anunciou que no próximo pleno se aprobará unha partida de 80.000 euros para material e equipamento. O obxectivo é que a obra poida estar entregada en maio, se poida equipar inmediatamente despois e estea a disposición dos veciños no verán, manifestou.
O edificio necesitou a investimento doutro millón de euros para adaptalo ao seu actual uso, dado que a estrutura de aceiro que se levantou ao principio para albergar a biblioteca quedou durante oito anos paralizada por diversos problemas coa empresa adxudicataria. Segundo explicaron os arquitectos redactores do novo proxecto, aproveitar esta estrutura deu case máis problemas que levantar unha nova, entre outras cousas porque o proxecto orixinal xa non cumpría ningunha das novas especificaciones de eficiencia enerxética e ata estaba fóra de ordenación no novo PXOM. Houbo que recortar case metro e medio da estrutura, incluído o muro de contención do soto, para axustala á nova aliñación da rúa marcada polo plan urbanístico.
O resultado é un edificio moi luminoso marcado polas ventás e unha escaleira interior que contaxia a súa personalidade a toda a estrutura. As salas e espazos deseñáronse pensando na máxima funcionalidade e comodidade, ademais da polivalencia.
A visita, na que Lara Méndez estivo acompañada polas concelleiras Ana González Abelleira e Olga López Racamonde, comezou pola planta baixa, onde un grande espazo polivalente que se dividirá con muros móbiles albergará unha bebeteca, con sala de lactación, na que os pais e os avós poderán compartir espazo e tempo cos máis pequenos.
A primeira e segunda planta destinaranse, en principio, a salas de lectura, dotadas con novas tecnoloxías, mentres que o último piso está pensado como sala multifunción na que os mozos, e tamén persoas maiores, poidan reunirse coma se tratásese dun cómodo salón. O edificio da Piringalla conta tamén con dúas terrazas que nun principio non estaba previsto que fosen abertas aos usuarios, aínda que agora, ante os novos usos derivados da pandemia, estúdase como aproveitar.
