Conceden licenza de obras do hotel na Compañía de María

O Concello de Lugo deu este mércores o visto e prace á licenza de obras para reformar e ampliar a antiga residencia de estudantes da Compañía de María, sita nas inmediacións da Avenida Ramón Ferreiro, para que albergue un hotel. O seu custo ascende a máis de 4,3 millóns de euros e o seu prazo de execución é de 30 meses.

O portavoz municipal socialista Miguel Fernández anunciou a autorización desta licenza de obras por parte da xunta de goberno local. Estas catro estrelas disporá de 89 cuartos —cinco deles suites—; un aparcadoiro cuberto con 80 prazas e unha zona verde duns 2.000 metros cadrados.

O hotel, promovido polo empresario lucense Dámaso Expósito da firma de hostalería Óktonal, será franquiciado da insignia Mercure, da cadea hostaleira francesa Accor.

O aloxamento, que contará cun persoal formado por uns 30 traballadores, disporá de salóns para acoller eventos, congresos, celebracións familiares ou reunións, así como un ximnasio, unha cafetería e un restaurante.

ALBEIROS E GARABOLOS. A xunta de goberno local tamén autorizou este mércores o prego administrativo para que a área de infraestruturas execute as obras de pavimentación da Rúa do Vento, que une Albeiros e Garabolos, que presenta mal estado.

Así mesmo deu luz verde á licenza de obras para catro proxectos particulares na zona rural, en Orbazai, San Xoán do Alto e Ribas de Miño.