Dúas alumnas de Enxeñería Civil, da Escola Politécnica Superior de Lugo, visitarán as sedes de Google, Facebook, Apple e Airbnb, no mítico Silicon Valley estadounidense, tras gañar un dos premios do proxecto Explorer do Banco de Santander.
A venezolana Andreína Mitsai Vargas Carrión e a portuguesa Daniela Lourenço dous Santos viaxarán a California o próximo 31 de outubro para asistir a varias clases maxistrais nas Singularity e Stanford University, á vez que farán 'networking' con traballadores destas empresas punteiras en internet, investidores e o resto dos 53 estudantes e emprendedores de España, Arxentina e Portugal que, como elas, foron seleccionados polo Centro Internacional Santander Emprendemento (Cise), na convocatoria do proxecto Explorer. Alí, Andreína e Daniela pretenden -como elas din- "empaparse o máximo posible" destes emprendedores que encabezan empresas punteiras en internet.
Xa de volta a España, a expedición que viaxará a Silicon Valley está citada na Cidade Grupo Santander, en Boadilla del Monte, onde un xurado integrado por representantes do Banco Santander, o Cise e entidades colaboradoras seleccionará os gañadores do Explorer 2019. Os tres mellores emprendedores recibirán unha dotación económica de 30.000, 20.000 e 10.000 euros, respectivamente, para que poidan acelerar os seus respectivos proxectos.
Andreína e Daniela foron as impulsoras de Timbersoul Innovations, unha 'spin off' que comercializará vigas de madeira baseadas no proxecto Life Eco Timber Cell. Estas vigas -máis lixeiras que as habituais- están feitas con piñeiro, castaño e eucalipto, dous taboleiros de fibras de alta densidade con restos de madeira de eucalipto e dous listóns de madeira serrada.
VANTAXES. Este material achega varias vantaxes fronte ás vigas tradicionais como o uso de madeiras locais e a aposta por unha construción máis ecolóxica co uso de madeira en lugar doutros máis contaminantes como o formigón e o aceiro. "Estas vigas son tamén máis resistentes que as tradicionais e, na súa construción, redúcese a cantidade de madeira nun 85 por cento. Do mesmo xeito que tamén diminúen os residuos e xeran menos emisións de dióxido de carbono á atmosfera dado que a madeira procede de plantacións forestais sostibles", afirma Daniela Lourenço, quen engade que as vigas tamén teñen a particularidade de imitar "o comportamento biomecánico das árbores".
Aínda que tan só é un proxecto, as promotoras pretenden polo en marcha como empresa en outubro de 2020, encargando a fabricación deste material a subcontratas e cunha planificación de vendas no resto de España e o norte de Portugal en 2021 e a súa extensión por Europa durante o ano seguinte. Ademais das vigas, Timbersoul propón trasladar este mesmo tipo de material a outros elementos construtivos como muros, cerramentos, forxados e cubertas.
ESCAPÓ DE VENEZUELA. Andreína Vargas saíu de Venezuela hai cinco anos -debido á situación política do seu país- rumbo a España co obxectivo de estudar Enxeñería Civil no campus de Lugo. Segundo di agora, a touro pasado, o paso "foi difícil pero cousas como estas fixeron que valla a pena o esforzo".
Esta moza venezolana acaba de graduarse en Enxeñería Civil e tiña unha bolsa de colaboración para a investigación no departamento de Hidráulica da Escola Politécnica Superior de Lugo. Alí traballaba con modelos numéricos de alta resolución para simular a hidrodinámica das rías galegas.
Á súa compañeira, Daniela Lourenço, aínda quedan flocos para graduarse. Daniela traballaba na plataforma Pemade, de Enxeñería de Madeira Estrutural, cando Manuel Guaita, catedrático da Politécnica, lles expuxo o proxecto Explorer. "Decidimos presentarnos e comezamos a participar, en febreiro, no proxecto europeo Life Eco Timber Cell pero non tiñamos ningunha esperanza de gañar. Había proxectos moi bos, baseados en teses, cos que competiamos. Foi toda unha sorpresa", di Daniela.