Foi un día de Todos os Santos atípico. Como o é a vida mesma, nestes tempos que corren. Non houbo colas, nin retencións nas entradas e saídas do cemiterio de San Froilán, aínda que o día en que todos nos acordamos dos nosos defuntos coincidía en domingo e permitía conciliar. Pero, a diferenza doutros anos, vivimos no medio dunha pandemia. E, quizá por ese motivo, as visitas este domingo foron moitas menos que o habitual, anticipándose neste caso a uns días antes.
"Houbo menos xente que outros anos. Tamén hai que dicir que as visitas espaciáronse máis, fixéronse durante toda a semana, desde ou luns, e iso outros anos non pasaba tanto. O venres foi o día que máis xente veu, sen dúbida", explicaba este domingo Serafín Saavedra, encargado do cemiterio San Froilán.
Ese día, o venres, si que houbo retencións que chegaron incluso ata os dous quilómetros, segundo afirman os gardas xurados que traballaron este pasado fin de semana nos accesos ao camposanto lucense.
"Non sei se influiría o confinamento perimetral ou non, quizais si, pero o venres había moito tráfico. Formáronse ringleiras de coches desde as dúas e media da tarde ata as seis", afirmaba un garda xurado.
MEDIDAS. Alí, apostados na porta, os gardas controlaban que todo o que entraba cumprise coas normas anticovid: entrar pola zona valada e usar xel hidroalcohólico. Non hai problema. A maioría da xente cumpre.
"Cúmprese coas medidas especiais e punto. Non hai maior problema en vir e estar aquí. Todo o mundo debera cumprir coas normas e non se fai, ese é o problema", contaba un dos lucenses que acudiu ao cemiterio a levar flores.
As restricións que hai dentro do camposanto eran simples: non máis de media hora de permanencia alí e non máis de tres persoas por sepulcro. Tampouco houbo problema: aínda que non se cronometrara o tempo de estancia no camposanto, á xente chégalle con media hora e a maioría vén en parella, dicían.
O confinamento perimetral, que entrou en vigor o pasado venres ás tres da tarde, fixo que xente de fóra chamase ao cemiterio para interesarse polas medidas restritivas dentro do camposanto e os horarios. "Chamáronnos da Coruña, de Rábade e de Sarria, entre outros sitios, preguntando estábase aberto antes das tres", apuntaba Serafín Saavedra, o encargado do cemiterio San Froilán.
MISAS. Outra das dúbidas que máis asaltou aos visitantes do cemiterio este ano foi saber se haberá ou non misas, como ata agora sempre foi habitual. "A xente pregunta moito polas misas pero este ano non hai, como tampouco haberá teatro o concertos musicais, como se fixo en edicións anteriores. Houbo que suspender todo debido á pandemia e para evitar posibles contaxios do virus", comentaba o encargado do cemiterio.
O que si houbo foi máis repartición de flores a pé de tumba. O motivo, como non, foi o coronavirus dado que moita xente non se puido trasladar debido ao peche perimentral da capital lucense.
"Si, este ano houbo moito máis floristas que outros. Viñeron traer eles directamente as flores xa aos nichos ou tumbas, debido á situación na que estamos. Pero, aínda así, eu non diría que hai menos flores que outros anos. Flores segue a haber, tráiganas os floristas ou os familiares", manifestaba Serafín Saavedra.
A Policía Local controlaba o acceso ao cemiterio, que se realizaba por unha entrada paralela, un pouco máis afastada da principal, dado que a habitual estaba sinalizada como vía de saída.
O mesmo sucedía dentro do camposanto. Había un carril, digamos, para entrar e outro diferente para saír. Ambos estaban valados e convenientemente sinalizados. Non era maior problema, a xente saía por onde lle correspondía e por onde estaba indicado polo Concello.
Tamén funcionou con normalidade o servizo especial de bus ao cemiterio que o Concello puxo en marcha estes días para facilitar o transporte ata o camposanto a toda aquela xente que non dispuxese de coche. Iso si como todos os anos.
