O comité de dirección de Abanca, máximo órgano de directivo da entidade tras o consello de administración, trasladou este luns a súa xornada de traballo a Lugo para sumarse, dese modo, á celebración das patronais de San Froilán, festas declaradas de Interese Turístico Nacional e unha das celebracións "máis tradicionais e multitudinarias de Galicia".
No transcurso desa xornada de traballo, os reitores da entidade financeira explicaron que o crédito de Abanca ao sector agrario da provincia de Lugo aumentou nun 25% -ao peche de agosto- con respecto ao ano anterior.
Segundo informou a propia entidade bancaria, o comité de dirección, formado polo conselleiro delegado, Francisco Botas, e catorce directores xerais, desprazouse este mediodía ata o recinto feiral de San Froilán, acompañado pola alcaldesa de Lugo, Lara Méndez, e o director territorial de Abanca en Lugo, Javier Soto.
Durante o seu percorrido polo recinto feiral, a delegación aproveitou para visitar as tradicionais casetas e comer o polbo.
En canto ao programa da tarde, a dirección da entidade financeira visitou un dos talleres formativos sobre banca móbil dirixidos a persoas maiores, que se están desenvolvendo no Espazo +60 da Obra Social Abanca en Lugo.
"A alta dirección de Abanca quixo participar con este xesto na conmemoración do Día da Educación Financeira, unha efeméride que marcou tamén o inicio do programa de educación financeira que o banco e a súa Obra Social Afundación desenvolverán ao longo do curso 2019-2020", precisou.
A continuación, o comité de dirección celebrou a súa habitual reunión semanal, "na que se abordan asuntos estratéxicos e operativos relevantes para a entidade e faise seguimento do día a día do negocio".
Ao termo desta sesión, "desenvolveuse o comité de investimentos, no que se revisaron e sancionaron diversas operacións de crédito".
Posteriormente, o comité de dirección de Abanca participou nun encontro de traballo da Territorial de Lugo, con máis dun centenar de profesionais da rede de oficinas da entidade nesta provincia, durante o cal repasaron as cifras "máis relevantes da actividade do banco" na provincia durante 2019.
Entre os datos analizados, destaca o crecemento do crédito, sinalou a entidade nun comunicado, "especialmente significativo en operacións de circulante a empresas", porque rexistrou un incremento anual superior ao 20%.
En financiamento ao segmento de negocios, o volume ata agosto aumentou nun 29% con respecto ao mesmo período do ano anterior.
"Gran parte deste avance do crédito susténtase no financiamento a sectores estratéxicos para a provincia e o tecido industrial lucense, como poden ser o agro e o mar, cuxo volume de investimento crece ao peche de agosto un 25% e un 70% interanual, respectivamente", conclúe.
