O comercio de proximidade da capital lucense recibía este luns unha dose de autoestima. Houbo un ir e vir de clientes. Chegáronse a rexistrar incluso colas ás portas dalgúns establecementos, que só podían ter o 30% de aforamento. Pero o máis importante para os empresarios é que esa afluencia de visitas traduciuse en compras.
“Os clientes expresaron o seu toma de conciencia de facer gasto para que nos vaia ben ao comercio tradicional”, afirmaba Mariña Reino, que este luns reabría, tras dous meses, a súa tenda de moda feminina, Mariña, na Rúa do Progreso.
Esta empresaria, que coa volta á actividade incorporou ás dúas traballadoras que estaban en Erte, destacaba que os lucenses “tiñan ganas de saír á rúa visitar os comercios”.
Coincidía con esa apreciación a responsable doutro comercio, neste caso de roupa infantil, Elvira Carreira, de Kucadas. “Estou contenta porque toda a xente que entrou, a maioría clientes habituais, comprou. Agradécese no primeiro día logo de dous meses”, afirmaba.
Pero esa esperanzadora primeira xornada contrasta coas expectativas que teñen os comerciantes para o que se aveciña. “O futuro véxoo negro. Teño a tenda a rebordar de roupa”, precisaba Elvira Carreira, que facía un chamamento ás autoridades locais para que contribúan a dinamizar o comercio de proximidade lucense.
AREAL. Tamén daba os seus primeiros pasos cara á normalidade un grande, Areal Perfumerías O grupo empresarial lucense reabría este luns máis dun terzo das súas tendas físicas, 18 das 48 que ten distribuídas por Galicia, Asturias, Cantabria, País Vasco e Castela e León. Na capital lucense só retomaba a actividade unha, a céntrica de Quiroga Ballesteros, cunha nutrida afluencia de público.
“Vimos moita animación nas tendas. A xente está con ganas de poder saír e comprar”, aseguraba o seu director comercial, Rafael Marzán, que precisaba que este luns era “un día especial” porque ademais “moitas persoas tamén acoden por temas de cambios, curiosidade, fidelidade...”.
Rafael Marzán quixo trasladar unha mensaxe optimista: “Polo menos estamos abertos e o noso persoal pode volver traballar”. Este grupo presentou un Erte que afectaba aos máis de 800 empregados dos seus 48 tendas físicas.
