Nos últimos anos non resulta nada raro ver a un grupo de rapaces escoitando trap a fume de carozo desde un altofalante ou desde o teléfono móbil. Este xénero, tan de moda, non é máis que unha das múltiples evolucións do rap, cuxas bases e segredos poderanse aprender a partir do 21 de agosto nunha serie de talleres organizados polo Concello. A actividade terá lugar no anfiteatro do parque Rosalía de Castro.
Os participantes poderán achegarse dunha forma lúdia a diversos estilos como as pelexas de galos, o micro aberto e a lírica
O rapeiro colombiano Julián Lince, máis coñecido como "Beelattor", será o encargado de impartir estes cursos de rap nas súas diferentes vertentes —pelexa de galos, micro aberto e lírica— co obxectivo de estender a subcultura entre os máis novos.
O rapeiro, pertencente ao grupo Sud Aks, ten moi claro que o enfoque destas leccións, que terán lugar o 21, 23 e 28 de agosto e os días 4, 6 e 13 de setembro, debe ser "lúdico". Lince é consciente de que aos rapaces cústalles estudar e de que ademais o rap funciona de forma "autodidacta".
O rapeiro enfoca estes talleres como un espazo no que poder escribir, practicar e familiarizarse con diferentes elementos da cultura hip hop, como o baile, o grafiti e a súa historia. O colombiano tamén cre que pola súa sinxeleza e pola relevancia da letra, este xénero resulta ideal para penetrarse na literatura. "Se lles interesa escribir acabarán sabendo quen é Quevedo e Neruda", describe o artista fincado en Lugo.
A elección dos estilos de rap non resulta casual. As pelexas de galos son un dos subxéneros máis famosos e populares e incluso se celebraron de forma informal en Lugo. O micro aberto provén das orixes do hip hop, cando grupos de persoas reuníanse no parque e deixaban o micrófono dispoñible por se alguén quería cantar.
"A xente sempre ten algo que dicir e normalmente non se lle deixa", defende o rapeiro, que deixará o micro ao alcance dos participantes para que poidan expresarse cantando, falando ou recitando poesía ao final de cada sesión.
A lírica, o rap máis puro e expresivo, debe ser unha forma de comunicación para os participantes, explica. As clases centraranse en conceptos como os beat ou ritmos. "O rap musicalmente falando é moi básico", recoñece o futuro profesor, polo que con dúas leccións resulta fácil aprender os conceptos básicos.
O obxectivo principal desta actividade é que os mozos poidan aprender a producir a súa propia música. Na actualidade moitas novas promesas soben os seus traballos a Soundcloud e outras webs para darse a coñecer.
UN XÉNERO EXITOSO. O rap conseguiu influenciar a numerosos xéneros, desde os máis independentes ata a música comercial. En España o trap e variedades similares estendéronse entre os mozos con músicos como Yung Beef, C Tangana ou da Dellafuente.
Lince pensa que dado o éxito que cultiva este xénero resulta ideal ensinalo. É unha forma de que os rapaces coñezan as orixes e de que non se deixen levar só pola "sexualidade e a decadencia" dalgunhas letras de trap, opina Lince.
Do underground ao público xeral
O colombiano pertence a unha escena bastante descoñecida en Lugo que aproveitará a oportunidade para saír á luz e promocionar o talento local.
Actuarán grupos e artistas da cidade como Sud Aks, Goma2crew e Kali aka A Negra. Tamén actuará Gaby, membro do grupo Cans Norteños de Vigo, xunto a un compañeiro.
O festival contará tamén con artistas de fóra de Galicia. "Vén de talla internacional Randee Acosta", anuncia Lince. O rapeiro cubano, moi recoñecido en Latinoamérica, reside na actualidade e Barcelona e ten moitos anos de experiencia ás súas costas.
A canaria AKA Eclipse tamén actuará durante o festival. Lince explica que non é moi coñecida fóra do mundo, pero destaca pola "súa letra exquisita", asegura. A rapeira ten tamén repercusión nas redes.
Batalla de galos
A idea orixinal era invitar a rapeiros famosos en pelexas de galos para que exercesen de xuíces, pero o festival coincide coa liga desta disciplina. Os organizadores aproveitaron para invitar a rapeiros emerxentes, para que no canto de avaliar se dediquen a "batallar", como parte do festival.
