O colectivo ecoloxista Adega e outros que forman parte da plataforma Lugo de cara ao Miño presentaron alegacións ante a Confederación Hidrográfica Miño-Sil, relativas á plataforma flotante proxectada polo Club Fluvial nunha zona do río. Dous son os eixos que sustentan estas alegacións, segundo explicou este martes a presidenta de Adega, Adela Figueroa, "ambiental e social".
Así, concretou que a obra "está prevista nunha zona integrada na Rede Natura 2000 e na Reserva da Biosfera". Un lugar que é, ademais, de especial conservación porque hai especies en perigo de extinción, como os nenúfares; e protexidas, como o mexillón de río. Ante isto, "non hai ningunha alusión no proxecto á compatibilidade de conservación da riqueza da flora e da fauna", constatou.
"Ninguén ten dereito a utilizar un fragmento do río e impedir o seu acceso para o resto da poboación, e con isto referímonos ás persoas e tamén aos animais"
Doutra banda, Figueroa pediu á Confederación "que faga cumprir a lei tamén a empresas privadas como o Club Fluvial, porque por lexislación hai que deixar cinco metros dun lado e doutro do río para que sexa accesible tanto ás persoas, como á fauna e flora".
Por parte de Adega criticaron a falta de seguridade de devandita obra, xa que no proxecto presentado "non se especifica como se suxeitará, polo que se se solta sería un perigo para todos". "Non sabemos se a plataforma podería colaborar para diseminar especies invasoras da zona do Miño", engadiu.
A presidenta do colectivo expresou que "o río ten que ser de todos e ten que estar limpo", polo que lles parece escandaloso que unha zona do Miño se privatice". "Ninguén ten dereito a utilizar un fragmento do río e impedir o seu acceso para o resto da poboación, e con isto referímonos ás persoas e tamén aos animais, que son a salvagarda e a protección destes espazos", sentenciou.