O incendio dun colchón que estaba apoiado sobre unha fachada, posiblemente debido a unha gamberrada, orixinou un incendio que non causou danos persoais pero si materiais e acabou por afectar a subministración eléctrica dun edificio. Dous clientes quedaron sen luz unas cantas horas, ata que a avaría puido ser emendada.
Os feitos sucederon ao redor das 8.30 horas da mañá deste domingo, nun edificio que fai esquina na rúa Pintor Villamil con Camiño Real. Tras recibir o aviso de que había un colchón en chamas e que estas estaban a alcanzar o balcón do primeiro piso, ata o lugar desprazouse unha dotación de bombeiros e patrullas tanto da Policía Nacional como da Policía Local, que colaboraron para regular a circulación e o paso dos peóns.
Unha vez sufocado o incendio, procedeuse tamén a avisar a operarios de Urbaser, xa que había moita sucidade tanto na fachada como na beirarrúa.
Tamén se puido comprobar que as chamas afectaran aos cables do tendido eléctrico que pasaban pola fachada, polo que tiveron que desprazarse técnicos de Viesgo para comprobar o alcance dos danos e cambiar as caixas danadas. Segundo informaron desde a empresa, as liñas queimadas só afectaron a dous veciños, que a media mañá xa tiñan totalmente restablecido o servizo.
Mentres, a Policía trata de buscar algunha cámara de seguridade que puidese gravar aos autores dos feitos, aínda que todo apunta a que se trata dun acto de vandalismo.
