Estudar converteuse nunha complicación para moitos lucenses que necesitan un espazo no que reine a orde e un ambiente de concentración e que, á vez, ofreza a posibilidade de consultar libros ou artigos.
A cidade só dispón nestes momentos de 396 prazas de estudo nas dúas únicas bibliotecas que ofrecen ese servizo, a Nodal, dependente da Xunta, e os Intercentros, da USC.
As normas de seguridade ante o covid provocaron unha redución substancial de prazas e nestes momentos chegan a rexistrarse colas para conseguir un posto de estudo. Na Nodal, en Ramón Ferreiro, xa adoita haber xente na porta ás oito e media da mañá co obxectivo de intentar asegurarse unha mesa.
As queixas pola falta de espazos para o estudo veñen de lonxe, pero se agudizaron co covid e a situación agrávase neste momento, cando moitos universitarios preparan os exames e acoden á Biblioteca Intercentros, no campus.
Con todo, a universitaria é a que ofrece neste momento máis postos de estudo: 292 e a USC asegura que abrirá outra sala se é necesario.
Pero esa disposición a ampliar o servizo non beneficiará a todos os lucenses que buscan un lugar onde estudar, moitos dos cales son opositores.
A razón é que co covid a USC limitou o acceso aos Intercentros, onde agora só poden acudir estudantes universitario ou persoas cunha titulación universitaria. Antes da pandemia, a biblioteca abríase a todo aquel que quixese estudar.
Trátase dunha medida que se tomou por seguridade e dado que é unha biblioteca universitaria. Pero o límite implica que nin sequera poden acudir alí os alumnos que nestes momentos preparan a selectividade, que son tamén un continxente numeroso e que tamén se queixa da situación.
Con todo, a USC defendía este mércores que, como moito, pode haber algunha cola puntual, pero que nos Intercentros hai unha rotación alta de alumnos e sempre acaba habendo prazas. Iso si, hai todo un protocolo para o acceso.
E en tanto, na Nodal nestes momentos só hai 104 postos de estudo, xa que o aforamento reduciuse á metade.
A Xunta di que a previsión é que as condicións de acceso poidan ir mellorando coa normalización da situación sanitaria, pero non hai prazos.
