O Club Fluvial ofrece remo terapéutico gratis a mulleres con cancro de mama

Acaba de comprar dúas embarcacións Dragon Boat, coas que facer un tipo de piragüismo apto para todos os públicos e que se aconsella para previr efectos secundarios do tumor como o linfedema
Un grupo de niños utilizando el Dragon Boat del Club Fluvial. EP
photo_camera Un grupo de nenos utilizando o Dragon Boat do Club Fluvial. EP

Sobreviventes de cancro de mama poderán aprender gratis a remar en Dragon Boat, un tipo de embarcación de orixe chinesa coa que se practica un piragüismo apto para todos os públicos e que se recomenda especificamente para previr o linfedema. A acumulación de líquido no mesmo brazo no que se detectou o tumor é un efecto secundario común e os beneficios de práctica deportiva están probados desde mediados dos 90.

O Club Fluvial de Lugo acaba de comprar dous barcos dragón e ofrece dúas sesións diarias, ás 11.30 e ás 17.00 horas, de acceso libre previa inscrición de calquera socio ou socia así como de pacientes oncolóxicas que queiran practicar esta actividade. Esta modalidade de piragüismo caracterízase polo traballo en equipo pola singularidade dos seus botes, adornados con cabezas e colas de dragón, o que lles dá unha gran vistosidade.

Poden participar equipos mixtos compostos por un mínimo de 12 persoas desde mozas ata veteranas. "Ilusiónanos especialmente poñer en marcha este proxecto porque exemplifica todos os valores que representan ao Club Fluvial. O fomento da actividade física, o acceso ao deporte, a inclusión social ou o respecto e coidado do medio ambiente forman parte desta tradición chinesa con máis de dous milenios de antigüidade", afirma o presidente do club, Tito Valledor.

A entidade contará cun equipo de monitores especializados que serán os encargados de formas aos participantes. Ademais do labor terapéutico e formativo, un dos desexos da entidade de cara ao futuro é crear un equipo que participe nas probas do calendario competitivo da disciplina. "Gustaríanos poder formar un grupo poida participar en competicións e que, oxalá, siga agrandando o histórico palmarés do noso club", conclúe Valledor.

Recomendada para recuperarse

A recomendación da práctica deste tipo de piragüismo comezou en 1995 despois de que o médico canadense Don Mackenzie, especialista en Medicina do Deporte e profesor universitario en Vancouver, describise o efecto positivo que producía na recuperación física das pacientes logo da cirurxía e a terapia. Todas lograron evitar efectos secundarios habituais como o do linfedema.

O Club Fluvial informa de que a disciplina non tivo polo momento un gran percorrido en España, pero que xa existen distintos colectivos que a practican, como Bolboretas Rosas da Coruña e equipos en cidades como Málaga ou Sevilla. Ademais, a Real Federación Española de Piragüismo incluíu esta especialidade dentro do seu calendario anual de probas.

Os socios interesados ou as pacientes oncolóxicas que queiran aprender a práctica xa teñen a inscrición aberta. O club ofrece 20 prazas.

comentarios