O Club Fluvial de Lugo terá que eliminar unha piscina infantil na canle do río Miño, "un pretil entre terra firme e o río" e respectar a servidume do dominio público hidráulico.
Estas son algunhas das razóns polas que a Confederación Hidrográfica Miño-Sil rexeitou ao Fluvial a concesión, ao non ter en conta estas recomendacións.
O presidente da Confederación Hidrográfica Miño-Sil, José Antonio Quiroga, recordou en rolda de prensa –na sede deste departamento do Ministerio de Medio Ambiente en Lugo– que a concesión ao Club Fluvial caducou en 2018 logo de 20 anos, mentres se lle denegou a licenza unha segunda vez por incumprimentos.
O "rexeitamento" veu dado porque "o proxecto non contempla a eliminación do obstáculos" e mantéñense "pechados" os cinco metros de servidume que se han de respectar.
Agora, ábrese un proceso de concorrencia "competitiva" para acceder á concesión, e poderíase presentar calquera ademais do propio Club Fluvial que leva traballando nesa zona do Miño máis de medio século.
Quiroga aclarou que "neste momento non hai concesión, está a tramitarse a extinción e iso ten un percorrido e uns procedementos de cara a unha hipotética terceira petición de concesión, que en calquera momento se podería producir".
O presidente da Confederación precisou que esas instalacións se sitúan "sobre unha hectárea de terreo", en concreto sobre 10.142 metros cadrados na ribeira do río Miño.
