As clínicas din que o seguro debe asumir os gastos das vítimas

A Asociación de Hospitais de Galicia (Ahosgal), que agrupa a unha ducia de centros privados, defendeu este luns que as compañías de seguros teñen que "satisfacer ás vítimas o importe dos danos sufridos na súa persoa e nos seus bens, así como os gastos e outros prexuízos aos que teña dereito segundo establece a normativa aplicable", que recorda que é a Lei sobre responsabilidade civil e seguro na circulación de vehículos a motor. Ahosgal responde así ás compañías de seguros que sosteñen, tal e como informou este diario o mesmo luns, que, se non existe un concerto, os hospitais privados poden cobrar ás vítimas de accidentes de tráfico se exceden un límite fixado pola aseguradora.

Esta asociación subliña que o condutor dun vehículo a motor, culpable dun accidente, é "o responsable dos danos causados ás persoas ou bens con motivo da circulación e que o seguro obrigatorio, coñecido como a terceiros, non cobre os danos do condutor". Por este motivo, a asociación galega de hospitais privados advirte de que é "importante" coñecer as condicións da póliza, xa que nalgúns casos "inclúense cláusulas que limitan a asistencia sanitaria aos condutores".

Ademais recorda que tan só a atención sanitaria dos condutores de vehículos nos sinistros en que só interveña un está "excluída" do convenio e do seguro obrigatorio, polo que indica que tan só a compañía "asumirá os gastos sanitarios do condutor no caso de que este os teña contratados expresamente". Recorda que os feridos nun accidente de tráfico teñen "dereito a decidir onde se recibe a asistencia sanitaria e quen a presta".