Ciudadanos urxe ao tenente de alcaldesa e edil de mobilidade de Lugo, Rubén Arroxo, a convocar a mesa do transporte para abordar varias "deficiencias" nas novas rutas do bus. Este grupo municipal fíxose eco de varias queixas de veciños como os referentes á falta seguridade viaria nalgunhas paradas e de información sobre horarios e itinerarios.
A portavoz do grupo, Olga Louzao, alerta da perda de usuarios e afea que Arroxo non se reuniu cos afectados, tras as máis de 400 reclamacións presentadas. Denuncia tamén falta de conexión entre varios barrios e o centro, como en Paradai.
"A mesa non pode esperar máis. Trátase dun compromiso adquirido publicamente polo tenente de alcalde do BNG que non se pode demorar máis xa que as deficiencias nas novas rutas supoñen un problema para moitos usuarios habituais, problema que se verá incrementado co inicio do curso ante a falta de conexión entre moitos barrios e os IES da cidade", apuntou a edila da formación laranxa.
Tras manter encontros en xuño e xullo con veciños das distintas zonas, Louzao agrupou os problemas detectados en tres categorías. "As deficiencias céntranse en problemas de seguridade viaria para chegar ás novas paradas, problemas por unha incomprensible falta de información sobre horarios e itinerarios en moitas paradas e problemas derivados da ineficacia de moitas das novas liñas que non cumpren a función de conectar os veciños cos equipamentos ou puntos estratéxicos da cidade nos que desenvolven as súas actividades, o que converte estas novas rutas nun servizo inútil para moitos veciños. Algo que trae como consecuencia un descenso no número de usuarios", sinalou.
"As deficiencias nas novas rutas supoñen un problema para moitos usuarios habituais, que se verá incrementado co inicio do curso", denuncia Cs
A concelleira puxo exemplos de zonas nas que se ven as deficiencias. "Respecto da falta de seguridade viaria é especialmente exemplificante o que sucede na Tolda. Os veciños e veciñas que queiran desprazarse á nova parada da Avenida de Madrid atópanse con que non teñen por onde facelo. Deben invadir a calzada, xa que carecen de beirarrúas ou de itinerarios peonís", advirte.
No que respecta á falta de información, Cs asegura que se atopou con ese problema en todas as reunións ás que asistiu. "A situación de Montirón describe esta problemática de forma nítida. O goberno local pintou no pavimento a nova parada pero carece de calquera soporte que informe dos horarios e itinerarios. Sabemos que o bus pasa por alí pero non sabemos cando nin a onde nos leva", asegura.
En canto á "ineficacia" dalgunhas rutas, Louzao asegura que, "aínda que moitos novos itinerarios funcionan de forma correcta, outros moitos fano de forma deficiente sen que o BNG teña a ben rectificar ou, polo menos, tomar en consideración moitas das reclamacións por escrito presentadas polos usuarios afectados".
Nese sentido, entende que a situación que se vive en Paradai "ilustra á perfección o que se vive en toda a cidade". "Agora por este barrio pasa o novo número 13, pero esta liña continua cara á zona das Gándaras, polo que os veciños de Paradai ven como se perde a conexión coa zona centro, cos institutos e ata co seu punto de atención primaria situado en Illas Canarias, polo que o novo servizo é totalmente ineficaz para este barrio", conclúe.
