O servizo de Cirurxía Vascular do Hula probou unha nova endoprótesis para o aneurisma aórtico abdominal, dilatación da aorta na zona do abdome. Utilizou o dispositivo, chamado Minos, nas intervencións de dous pacientes que tiveron lugar en xaneiro e febreiro deste ano. Ambos recibiron o alta ás 24 horas e atópanse ben tras a cirurxía.
O xefe do servizo, José María García Colodro, explica que se trata dun implante "de moi baixo perfil, o que fai que a agresión arterial no punto de acceso femoral sexa mínima e por suposto faise de modo percutáneo, por punción". Dese xeito, o postoperatorio dos pacientes aos que se lles coloca é máis breve e sinxelo. Ademais, a prótese ten a vantaxe de que o sistema de liberación dentro da aorta é moi ergonómico, o que facilita o paso do implante e fai que a intervención poida concluírse en apenas unha hora.
Ademais, outra das novidades nestas dúas cirurxías -realizadas polos doutores Alejandro Rodríguez Río e Luís Franco Núñez- é que se utilizou CO² como medio de contraste para visualizar as arterias. "Evita o dano renal que os contrastes con yodo poden producir", explica o doutor García Colodro. Este tipo de contraste elimínase a través dos pulmóns e non dos riles, como ocorre co convencional de yodo. O Hula participará no rexistro internacional de seguimento de resultados deste implante.
O abdominal é o máis común dos aneurismas aórticos. Descoñécese a causa exacta que o provoca aínda que si se sabe que hai factores que poden predisponer a desenvolver este problema, como o tabaquismo, a hipertensión ou algúns factores xenéticos. O perfil de paciente que, con maior frecuencia, sofre un aneurisma aórtico é o dun home de máis de 60 anos que ten polo menos un deses factores de risco. A miúdo non perciben síntomas ata que rompe.
