O Círculo das Artes de Lugo acometerá durante este mes de decembro unhas obras de rehabilitación da cúpula de zinc da fachada, un elemento singular neste edificio construído no ano 1898 e onde se detectaron nos últimos tempos humidades que era necesario reparar para evitar que a deterioración fose a máis.
Os traballos de reparación da cúpula comezaron onte coa colocación das estadas por parte da empresa Lugo Canal, á que a directiva desta centenaria sociedade adxudicou os traballos de reparación, que teñen un orzamento duns 20.000 euros e, ademais, contan cunha subvención de 15.000 euros por parte da vicepresidencia de cultura da Deputación Provincial.
Segundo explican fontes da directiva, os traballos teñen os preceptivos permisos da Dirección Xeral de Patrimonio da Xunta, xa que trátase dun edificio catalogado, así como as licenzas de obra e ocupación de vía pública do Concello, e prevese que conclúan antes de final de ano.
Aínda que ao longo do día de hoxe está previsto que o arquitecto contratado para a dirección da obra e os técnicos da empresa supervisen os danos que afectan á cúpula, en principio as obras consistirán na substitución de aqueles ferros de zinc da cuberta polas que se rexistran as filtracións de auga, así como do canlón da fachada.
A xunta directiva do Círculo das Artes tamén ten previsto reunirse hoxe co arquitecto e a empresa para analizar se as obras previstas son suficientes para dar por solucionadas as humidades que afectan o edificio, que non chegaron a provocar pingueiras, aínda que fan necesaria unha rápida actuación.
MATERIAL NON HABITUAL. A singularidade desa parte do emblemático edificio da Praza Maior provén da utilización do zinc para o revestimento da cúpula, un material que non era habitual que se usase na construción na capital lucense, aínda que si se pode ver en moitos edificios históricos doutras capitais españolas.
