A capital lucense, con tres monumentos Patrimonio da Humanidade, ben podería ser promocionada como unha cidade para perderse, aínda que á vista dos problemas que algúns turistas teñen para dar con lugares que queren visitar pola falta de sinalización, o slogan podería ser malinterpretado.
O principal problema atópao o visitante que chega á cidade para dar coas oficinas de turismo, tanto a municipal como a da Xunta, que se atopan escondidas na Praza do Campo e Rúa do Miño. Non hai apenas sinais para indicar a súa localización –atópanse só ao chegar á Praza do Campo– polo que quen buscan información acaban preguntando no concello ou en hoteis e locais de hostalería.
Tampouco están convenientemente indicadas as estacións de autobuses e de tren. Ademais, chegar a esta última é todo un reto para o turista que chega en automóbil, porque non hai un acceso directo á mesma se se chega desde A Fervedoira ou desde Montero Ríos.
As estacións de autobuses e de tren tampouco están ben indicadas
Os principais monumentos como a muralla ou a catedral si que son visibles para o turista unha vez chega ao recinto histórico, aínda que nas autovías A-6 e A-54 non hai ningún sinal que informe de que son Patrimonio da Humanidade. Algúns grupos políticos como En Marea ou PSOE chegaron a pedir no Congreso que Fomento instalase carteis indicativos desta catalogación, aínda que desde o ministerio respondeuse que deben de ser os concellos interesados os que teñen que realizar a instalación, conservación e mantemento de todos os sinais turísticos nesas vías.
CAMIñO PRIMITIVO. Pero se hai un Ben Mundial que en Lugo apenas conta con sinalización ese é o Camiño Primitivo, sobre todo na zona rural. Os peregrinos teñen que recorrer moitas veces a preguntar aos veciños para poder atopar monumentos que queren visitar, como as igrexas barrocas e románicas que hai ao longo da ruta en Lugo. é o caso das capelas do Burgo, Prógalo ou Bacurín, onde se pode mellorar moito a sinalización, do mesmo xeito que a basílica prerrománica de Santa Eulalia de Bóveda, cuxa sinal indicador na estrada desde a que se accede está tirada na cuneta. Fóra do Camiño, parroquias interesantes para o turista como Bocamaos, Meilán, Romeán ou Santiago de Saa non tes unha convenientes sinalización, do mesmo xeito que ocorre con espazos naturais interesantes como as diferentes rutas de sendeirismo existentes ao longo dos ríos Miño, Rato e Mera.
O PP critica que non se pedisen axudas á Xunta
O grupo municipal do PP lamentouse este martes de que o goberno local non solicitase este ano as axudas que a Xunta concede para mellorar a sinalización turística en municipios e anunciou que preguntará por que non se pediron.
O concelleiro popular Ángel Trabada recordou que o ano pasado o goberno local si optou a estas subvencións, obtendo unha de 50.000 euros e que, segundo o edil, foi o 75% do investimento total que o Concello realizou para renovar a sinalización turística de Lugo.
"Desprezo ao turista"
Trabada, que ve un "desprezo" aos turistas o feito de que o Concello non solicitase este ano as axudas, considera que a sinalización turística "está moi mal", aínda que admite que mellorou nos últimos anos grazas ao "esforzo da iniciativa privada".
