A Confederación Hidrográfica do Miño-Sil (CHMS) analizará se existe materia orgánica flotante nas augas do Miño ao seu paso por Lugo, tras detectarse este venres pola mañá a presenza de restos dunha espuma branca nun tramo situado enfronte do Club Fluvial, alén do caneiro e próximo ao Paseo do Miño.
Este tipo de residuos son visibles varias veces ao longo do ano. Nesta ocasión, membros da gardería fluvial da CHMS en Lugo consideraron, a primeira vista, que podería tratarse de materia orgánica en suspensión, derivada das últimas choivas rexistradas esta semana e que arrastra o río. Nese caso, descartaríase, xa que logo, nunha primeira apreciación que se trate dunha vertedura.
A pesar diso, os técnicos da Confederación Hidrográfica desprazados ata o curso fluvial decidiron tomar mostras da auga co fin de analizala en laboratorio e determinar, deste xeito, se é materia orgánica en suspensión ou se se trata da vertedura dalgún tipo de residuo particular ou industrial.
SANCIóNS.Durante o pasado ano, a Confederación Hidrográfica do Miño-Sil abriu 51 expedientes por verteduras de augas residuais na provincia de Lugo, menos dos que se incoaron en Ourense (68) e máis dos que se iniciaron en Pontevedra (36).
á súa vez, este mesmo organismo tramitou, durante 2017, a apertura de 70 expedientes de autorización de verteduras, máis que en Ourense (26) e Pontevedra (30).
