A Audiencia Provincial de Lugo ten previsto celebrar a próxima semana a vista oral dunha das múltiples pezas nas que se dividiu a operación Carioca. Trátase da primeira desas pezas que abarca a práctica totalidade do sumario, pero, con todo, chegará a sala moi desinflada desde o seu punto de partida.
Neste asunto, cuxa instrución iniciou a xuíza Pilar de Lara a finais de strong <>2008, chegaron a estar imputados unha quincena de policías nacionais da comisaría de Lugo e funcionarios de Inmigración e Estranxeiría. De feito, foi esta causa a que determinou a entrada e rexistro na comisaría e os servizos aludidos.
No entanto, ao longo da prolongadísima instrución determinouse o arquivo das acusacións para a maior parte dos procesados, de tal xeito que a próxima semana só sentarán no banco dúas persoas: o que fose inspector xefe da brigada de Estranxeiría e un funcionario adscrito á mesma unidade que ademais exercía de avogado privado. Acúsaselles de tramitar con información falsa prórrogas de estancia en España a determinadas mulleres relacionadas cos distintos bordeis que se investigaron na operación Carioca.
A Fiscalía acusa por strong<> falsidade en documento público ou oficial e negociacións prohibidas a funcionarios e solicita catro anos e medio de prisión para o inspector xefe e unha multa de strong<> 900 euros para o funcionario. Ambos están xa xubilados e o policía que era o principal imputado nesta peza faleceu xa fai un par de anos.
TRES DÍAS. A pesar de todo, a Audiencia reservou tres días para esta vista oral, o martes, mércores e xoves. O motivo é a notable cantidade de testemuñas que foron chamados a declarar, aínda que é previsible que algúns deles non comparezan porque non puideron ser localizados, en especial varias das mulleres supostamente beneficiarias dos expedientes de estranxeiría. Ademais, están citados varios axentes da investigación, un excomisario xefe e dous avogados lucenses.
