O Consejo General del Poder Judicial acordou, na Comisión Permanente celebrada o día 11 de xuño, renovar as medidas de apoio para reforzar os xulgados do Social de Lugo, como consecuencia do elevado número de casos que soporta cada unha das unidades xudiciais da capital lucense.
En concreto, segundo informa o Tribunal Superior de Xustiza de Galicia, aprobou unha comisión de servizos, que inclúe a substitución de funcións, a favor do titular do Xulgado de Primeira Instancia e Instrución único da Fonsagrada, Eladio Prieto Bello, co obxectivo de finalizar ao redor de 60 asuntos relacionados con reclamacións por despedimentos ao mes.
Por outra banda, deulle o visto e prace á renovación da comisión de servizos a favor de María Gabriela Gómez Díaz, titular do Xulgado de Primeira Instancia e Instrución número 1 de Vilalba, para reforzar “de forma xenérica os xulgados do Social de Lugo”.
Esas dúas medidas de apoio estarán en vigor ata o día 31 de decembro de 2019.
Para tomar esta decisión, a Comisión Permanente do CGPJ tivo en conta “a evolución e o estado dos órganos a reforzar”, dado que “ao finalizar o primeiro trimestre de 2019 os xulgados do Social de Lugo tiñan en trámite 4.426 asuntos, unha media de 1.475 por órgano xudicial”.
Así mesmo, o CGPJ tamén aprobou o reforzo, ata final do presente ano, do Xulgado de Primeira Instancia número 6 de Ourense, especializado en dereito “de familia, determinación da capacidade e internamentos”, cunha comisión de servizo -sen substitución de funcións- a favor do titular do Xulgado de Instrución número 2 de Ourense, Luis Doval Pérez.
