Antes de que finalice 2021 abrirá as súas portas ao público o primeiro centro integral de saúde de Galicia, que se situará no barrio da Residencia da capital lucense. A Consellería de Infraestruturas e Mobilidade adxudicou á multinacional Acciona, entre as 17 empresas aspirantes, as obras de rehabilitación do inmoble que o albergará, o antigo Hospital Materno-Infantil, por un importe de 11,4 millóns de euros -medio millón menos do orzamento inicialmente previsto-.
As obras iniciaranse a principios do ano que vén e o seu prazo de execución será de 20 meses, segundo deu a coñecer a titular deste departamento autonómico, Ethel Vázquez, durante a visita que realizou onte ao vello hospital, que pechou as súas portas fai xa case nove anos.
A conselleira de Infraestruturas e Mobilidade destacou que este proxecto, que asegurou que é "estratéxico" para a Xunta de Galicia, permite "fomentar o desenvolvemento do barrio da Residencia para contribuír a facer cidade en Lugo", ademais de aproveitar "ao máximo os equipamentos".
Este centro integral de salud, que ocupará unha superficie total de 8.000 metros cadrados distribuídos en seis plantas, albergará un centro de saúde, o Punto de Atención Continuada (PAC) que se atopa actualmente en Fingoi, a unidade de saúde mental e o seu hospital de día e a base das ambulancias do 061, que está no parque empresarial das Gándaras, así como servizos de radioloxía básica e análises clínicas.
"Unha das bondades deste proxecto é que pode seguir crecendo porque queda unha planta libre", precisou o técnico que explicou ás autoridades presentes a obra a acometer.
CINCO MESES. Ethel Vázquez tamén fixo fincapé en que en só "cinco meses" licitouse e adxudicouse esta actuación, que dixo que supón o maior investimento público na capital lucense este ano. Recordou ademais que están inmersas cinco consellerías da administración autonómica. Cando se acometan as obras de rehabilitación, tamén se procederá á derriba da L que unía o Materno-Infantil co xa demolido Xeral, onde se atopaban a cafetería e o servizo de urxencias pediátricas.
Ethel Vázquez estivo acompañada na súa visita pola directora xeral de recursos económicos do Sergas, María Jesús Piñeiro; o delegado territorial da Xunta, José Manuel Barreiro, e a alcaldesa de Lugo, Lara Méndez, entre outras autoridades. Ademais de solicitar a colaboración do Concello de Lugo na concesión de licenzas para os proxectos pendentes, a conselleira pediu tamén que acondicione urbanisticamente as vías públicas da contorna do Hospital Xeral e que adapte a súa mobilidade aos novos servizos.
A titular de Infraestruturas e Mobilidade encadrou esta actuación, xunto coas que se iniciarán nos próximos meses, na recuperación dun barrio emblemático da capital lucense "poñendo arredor de 21.000 metros cadrados a disposición dos veciños, con novos servizos e equipamentos que mellorarán a súa calidade de vida", manifestou.
PRÓRROGA. A Consellería de Infraestruturas e Mobilidade recolleu esa advertencia e xa solicitou ao Concello este venres a prórroga da licenza.
