Centos de persoas congregáronse este martes na capela do Carme de Lugo para celebrar o día grande da Virxe. A numerosa presenza de devotos obrigou á organización a colocar cadeiras e dúas pantallas de televisión no exterior da igrexa para que os fieis que non puideron entrar na pequena capela puidesen seguir os oficios.
As misas comezaron xa pola mañá, coa celebración de varios oficios cada hora desde as nove ás doce. Tamén estivo exposto o Santísimo.
A liturxia principal, celebrada ás oito da tarde e que puxo fin á novena celebrada desde o luns da semana pasada, estivo presidida polo bispo de Lugo, monseñor Carrasco Rouco, e foi acompañada polo coro Cantabile, chegado desde A Coruña para participar nesta festividade.
Ao remate da misa, a imaxe da virxe do Carme foi arroupada polos fregueses que a acompañaron na procesión, que este ano ampliou o seu itinerario. O desfile, amenizado polo grupo de gaitas Nubeiro, desenvolveuse pola Rúa do Miño, a Praza do Campo, a Rúa Nova e a Praza da Soidade. O coro Cantabile tamén interpretou unha composición en honra á Virxe.
Á celebración acudiron a subdelegada do Goberno, Isabel Rodríguez; a alcaldesa, Lara Méndez, varios concelleiros e os irmáns maiores das demais confrarías de Lugo.
Este ano, ademais do percorrido ampliado e as instalacións para os fregueses que non puideron entrar, incorporáronse varias novidades. Os costaleros que portaron a imaxe da Virxe e os que levaban a cruz e os dous ciriais luciron túnicas brancas e escapularios. Ademais, as mulleres confrades acompañaron a talla ataviadas con mantilla e peite.
