Axentes da Policía Local de Lugo denunciaron a catorce persoas na madrugada do venres por incumprir o toque de queda decretado polas autoridades sanitarias para controlar a pandemia e evitar a propagación do covid-19, xusto o día antes de que entrasen vigor as novas restricións decretadas pola Xunta de Galicia, que o adiantan ás 22:00 horas.
Segundo informou a propia Policía Local, as denuncias producíronse por mor dos controis de seguridade despregados pola cidade para velar polo cumprimento da normativa sanitaria e, en concreto, do toque de queda, decretado ata as 23:00 horas.
Para efectuar eses controis, a Policía Local utilizou, ademais dos coches patrulla habituais, vehículos camuflados, e todas as persoas sancionadas atopábanse na vía pública superada esa hora e sen causa xustificada para non respectar o toque de queda.
As persoas denunciadas foron sorprendidas polos axentes cando transitaban pola Rúa Nova, a Ronda de Fontiñas e as rúas Río Eo, Camiño Real, Illas Cíes e Otero Pedrayo.
A multa por saltarse o toque de queda oscila entre 601 e 30.000 euros.
