En plena época de apoxeo turístico, a catedral de Lugo dista moito de estar preparada para todos os seus visitantes por igual. Turistas e fregueses decatáronse da ausencia dunha entrada adaptada para persoas con mobilidade reducida. Entrada que, doutra banda, si estaba presente ata hai pouco no edificio, pero que tivo que ser retirada recentemente tras ser destruída nun acto vandálico.
Se as condicións de diversas estancias eran, como mínimo, complicadas para persoas con mobilidade reducida, agora a situación empeorou coa desaparición da rampla situada na entrada da porta esquerda pola Praza de Pío XII, a única que ata a data estaba adaptada para persoas con este tipo de problemáticas.
Con todo, o motivo da súa desaparición non foi outro que a súa rotura. Desde a propia catedral esperan que a rampla estea arranxada para mediados de mes, tendo en conta a gran cantidade de traballo que teñen os seus carpinteiros actualmente reparando o tellado do edificio. A institución dubida entre colocar outra de madeira ou, polo contario, unha de metal como a que había outrora, pero que foi roubada.
A situación tamén ocasionou varias reclamacións de usuarios, que se puxeron en contacto coa asociación Auxilia para pór en coñecemento o feito.
A PEOR. De feito, asociacións como Auxilia, ademais doutras que tamén loitan polos dereitos das persoas con mobilidade reducida, destacan que este problema é só un máis na lista de cousas a mellorar.
Reclaman a construción dun carreiro polo atrio adaptado para persoas en cadeiras de rodas debido ao mal estado que presenta o actual, ademais do inicio das obras do claustro que teñen previsto incluír un ascensor que dea acceso aos museos catedralicios.