Un aluvión de altas, 577 concretamente nun día, unido a un descenso dos contagios diarios, permitiu que os casos activos de coronavirus baixen na provincia de Lugo por primeira en moitas xornadas, se non temos en conta que o pasado xoves se produciu un descenso artificial motivado polo reaxuste do novo sistema de reconto, que agora contempla o alta aos sete días.
Desta forma, os casos activos baixan desde os 7.547 que reflectía o balance do domingo aos 7.439 que aparecen no da este luns. Son 108 menos. E é que en 24 horas detectáronse 469 positivos por covid-19, unha cifra moi inferior aos 848 e 966 das xornadas precedentes.
A presión hospitalaria, iso si, continúa aumentando. Hai xa 68 pacientes covid ingresados (cinco máis), dos que seis se manteñen na Uci do Hula. O resto, 62 concretamente, evolucionan en planta: 46 no hospital lucense (+2), nove no da Mariña (+2) e un no de Monforte (+1).
O coronavirus cobrou a vida de 277 persoas desde o comezo da pandemia, aínda que Sanidade contabiliza 269 ao non ter en conta o deceso de varios lucenses fóra da provincia. A última vítima é unha muller de 94 anos que faleceu no Hospital de Monforte o pasado xoves, día 13 de xaneiro.
En todo este tempo superaron o virus 27.501 lucenses, tras as 577 altas notificadas en 24 horas.
GALICIA. Os casos activos de covid-19 retardan o ascenso no conxunto de Galicia con 132 máis, ao situarse en s72.573, ao reducirse en tres das sete áreas sanitarias as infeccións, mentres que os novos contaxios tamén baixan a uns 4.900, fronte aos máis de 7.800 do día anterior. Pola súa banda, os pacientes hospitalizados por este coronavirus ascenden a 610 –que implican 41 máis–, pero a taxa de positividade redúcese a un 18 por cento.
Segundo os datos actualizados na mañá deste luns pola Consellería de Sanidade con rexistros ata as 18.00 do domingo, mantéñense en 54 as persoas ingresadas en Uci por covid-19 en Galicia --sen cambios--, mentres que ascenden a 556 as hospitalizadas noutras unidades –41 máis– e 71.963 pacientes atópanse en seguimento no seu domicilio.
Por áreas sanitarias, a presión hospitalaria aumenta en seis das sete áreas sanitarias e alíviase unicamente na de Ferrol, que mantén tres pacientes covid en uci e rexistra 31 noutras unidades --un menos--.
Na área de Vigo continúan dez pacientes ingresados por covid en Uci e soben a 89 os hospitalizados noutras unidades –11 máis–; mentres que na de Ourense seguen oito en críticos e aumentan a 85 noutras unidades –dez máis–.
Polo seu lado, na da Coruña e Cee mantéñense 14 pacientes covid en UcI e increméntanse a 134 os ingresados noutras unidades –oito máis– e na de Santiago e Barbanza aumentan a seis os críticos –un máis– e a 84 os hospitalizados noutras unidades –seis máis–.
No caso da de Lugo seguen seis ingresados por covid-19 en Uci e aumentan a 62 os doutras unidades –cinco máis–, mentres que na de Pontevedra e O Salnés descenden a sete os críticos –un menos–, pero soben a 71 os doutras unidades –dúas máis–.
CASOS ACTIVOS. A tendencia ascendente dos casos activos no conxunto de Galicia retardouse no inicio da terceira semana de xaneiro e sitúanse nos 72.573, que supoñen 132 máis que a xornada anterior, ao haber lixeiramente máis contaxios (4.916) que altas (4.782), ao que se engaden dous falecementos. O luns da semana pasada había 67.724 infeccións.
Por áreas sanitarias, os casos activos descenden en tres das sete: Ourense (-251), Santiago e Barbanza (-129) e Lugo (-108), mentres que aumentan nas outras catro: Vigo (+355), Pontevedra e O Salnés (+140), A Coruña e Cee (+91) e Ferrol (+34).
Xa que logo, con máis casos activos mantense a área sanitaria deVigo, con 19.002; seguida da da Coruña e Cee, con 14.747; Santiago e Barbanza, con 10.700; Pontevedra e O Salnés, con 8.459; Ourense, con 8.149; Lugo, con 7.439; e á cola segue a de Ferrol, con 4.077.
Segundo os últimos datos actualizados polo Ministerio de Sanidade este pasado venres 14 de xaneiro, a incidencia acumulada a 14 días de Galicia sitúase en 3.350,78 casos por 100.000 habitantes, fronte aos 3.192,46 de media en España.
MENOS DE 5.000 CONTAXIOS. Os novos contaxios de covid-19 volven descender en Galicia e arrincan esta semana con 4.916, que implican case 3.000 menos que a xornada anterior na que se situaron por baixo dos 8.000 tras dous días consecutivos por enriba desa cifra. O luns 10 de xaneiro detectáronse 4.966.
Así, Galicia rexistra desde o inicio desta pandemia 340.522 contaxiados por coronavirus, dos que 78.415 corresponden á área de Vigo; 72.174, á da Coruña; 51.279, á de Santiago; 42.486, á de Ourense; 40.524, á de Pontevedra; 35.215, á de Lugo; e 20.429, á de Ferrol.
Nas últimas 24 horas leváronse a cabo 5.262 PCR –unhas 2.400 menos que a xornada anterior–, que eleva a 3.468.165 as realizadas desde o inicio da pandemia; e 5.987 test de antíxenos –uns 4.200 menos–, que suman 1.296.935. Entre ambos os tipos representan 11.249 probas efectuadas.
En canto á taxa de positividade en PCR descende a un 18,28 por cento no inicio desta semana tras pechar a pasada cun 21,8%. Deste xeito, segue por encima do limiar do 5% que fixa a Organización Mundial da Saúde (OMS) para dar por controlada a pandemia.
VÍCTIMAS E CURADOS. As persoas falecidas diagnosticadas con covid-19 desde o inicio desta pandemia en toda Galicia ascenden a 2.847, ao notificar a Consellería de Sanidade este domingo dúas novas vítimas.
En concreto, un dos óbitos produciuse o sábado 15 de xaneiro e correspondeu a unha muller de 77 anos ingresada no Chus e o outro, rexistrado este domingo pasado, foi o dun home de 84 anos no Chup. Ambos presentaban patoloxías previas.
Pola súa banda, 265.149 persoas diagnosticadas de coronavirus curáronse no conxunto da comunidade galega desde o comezo desta crise sanitaria, que supoñen 4.782 máis que as rexistradas ata o día pasado.
