Os casos activos de coronavirus na provincia de Lugo sitúanse por baixo do milleiro por primeira vez en case dous meses (non se baixaba desa cifra desde o pasado 17 de xullo).En concreto, os datos actualizados este xoves pola Consellería de Sanidade —recompilados ata as 18.00 horas do mércores— mostran que hai un total de 950 persoas coa infección activa, xusto cen menos que no anterior balance do Sergas.
Un descenso que se explica na contención dos novos contaxios e no elevado número de altas outorgadas na última xornada. Así, en 24 horas diagnosticáronse 21 novos positivos —en liña cos 26 comunicados martes e mércores— e superaron a enfermidade 121 persoas.
Neste contexto, a situación mantense estabilizada nos centros sanitarios lucenses, que contan con 24 pacientes covid ingresados, un menos que o día anterior, dos que catro se atopan na unidade de coidados intensivos do Hula (sen cambios). O resto están en planta, 14 deles no Lucus Augusti, cinco no hospital de Monforte (sen cambios nestes dous centros) e un no da Mariña (un menos).
Desde o inicio do plan de continxencia pola pandemia, na provincia superaron a enfermidade 18.382 persoas e faleceron 246 pacientes covid, aínda que Sanidade contabiliza 238 ao non incluír nas súas contas algúns decesos de lucenses producidos noutras provincias. A última vítima é un usuario da residencia das Gándaras de 79 anos, cuxo deceso foi comunicado na noite do martes
GALICIA. A comunidade rexistra un total de 4.793 casos activos de coronavirus, 384 menos que no último reconto, e a presión hospitalaria sofre unha caída, con 52 pacientes menos de covid-19 hospitalizados, ata os 117 en total, segundo os datos facilitados polo Servizo Galego de Saúde (Sergas) solicitados ata as seis da tarde do mércores.
A baixada no total de hospitalizacións responde a unha caída tanto dos pacientes ingresados en planta como dos ingresados en Uci, que descenderon a 43, seis menos nas últimas 24 horas.
Doutra banda, os contaxios volveron a aumentar nas últimas horas, ata 176 contaxios novos, 26 máis que o mércores.
Desde o inicio da epidemia contaxiáronse 180.591 persoas en Galicia e recuperáronse 173.236, das que 527 corresponden á última xornada. O número de falecidos ascende xa a 2.595, tras tres mortes comunicadas o mércores polo Sergas.
Por áreas sanitarias, o descenso volve ser xeralizado en todas as provincias por quinta xornada consecutiva, sendo o máis acusado a da área de Lugo, zona na que os casos caen en 100, ata 950.
Séguenlle a área da Coruña, con 76 casos menos e un total de 1.225 casos activos; a área de Santiago de Compostela, que contabiliza 65 casos menos, ata os 873; e a de Vigo, que rexistra 66 menos, ata os 702.
Os rexistros reflicten que os casos en Ferrol descenden en 31, ata os 230; e tamén a da área de Ourense baixan en 31 ata os 512. Para rematar, a área de Pontevedra mostra quince menos, ata os 301.
